Búgin aýyl ákimderin saılaý qarsańynda Mańǵystaý oblysyndaǵy «Azamattyq Aláns» úkimettik emes uıymnyń basshysy Jibek Ahmetova pikir bildirdi, - dep habarlaıdy mangystaumedia.kz saıty.

«Bıyl aýyl turǵyndary saılaýǵa belsendi qatysýy kerek. Sebebi, elde birinshi ret ótip otyr. Ekinshiden, kópten beri el arasynda «aýyl ákimderi durys jumys istemeıdi», «aýyldyń damý qarqyny tómen», «sheshimi tappaǵan másele kóp» degendi jıi estımiz. Al atalǵan máseleni sheshýde aýyl ákiminiń atqarar róli mańyzdy. Sondyqtan aýyl turǵyndary búgingi múmkindikti jiberip almaı, saılaýǵa jaýapkershilikpen qatysýy qajet», - deıdi Jibek Ahmetova.

Onyń aıtýynsha, atalǵan shara jergilikti turǵyndardyń saılaýǵa qatysý mádenıetin qalyptastyrýǵa septigin tıgizedi.

«Osy ýaqytqa deıin turǵyndar saılaýdaǵy daýysynyń mańyzdy ekenine nazar aýdarmaǵan edi. Al qazir árbir aýyl turǵynynyń daýysy men tańdaýy óte mańyzdy. Búgingi aýyl ákimi, erteńgi aýdan ákimi bolýy da múmkin. Sondyqtan, biz, aýyl ákimderin qanshalyqty durys saılasaq, bolashaq ta sonshalyqty jarqyn bolady. Sondaı-aq óz kezeginde óńirdiń alǵa jyljýyna, ekonomıkasy men áleýmettik ahýalyna septigin tıgizeri anyq. Eger aýyl halqy óz ákimin saılaıtyn bolsa, onda ákim jaýapkershilik júgin arqalap, tıanaqty is tyndyrýǵa tyrysady. Halyqtyń tańdaýymen saılanǵan ákim sol aýyldyń damýy úshin bar kúsh-jigerin jumsaıtyny sózsiz. Iaǵnı, ákimdi saılaıtyn da, saılanǵan soń esep suraıtyn da halyq ekenin umytpaıdy», - deıdi Jibek Ahmetova.