Eline qaıtýdan bas tartqan belarýs sportshysy Krıstına Tımanovskaıa japondyq polıseılerden qorǵaýdy suraǵannan keıin, qazir qonaqúıde qaýipsiz jaǵdaıda.

24 jastaǵy Krıstına Tımanovskaıa Tokıonyń Haneda áýejaıyndaǵy qonaqúıde túnegen. Ol jeksenbide jattyqtyrýshylardy jáne belarýs bıligin synǵa alǵany úshin májbúrli túrde áýejaıǵa jetkizilgenin aıtady.

Belarýs bıligi onyń komandadan emosıonaldyq jaǵdaıyna baılanysty shyǵarylǵanyn aıtady.

Sportshyǵa Chehıa men Polsha vıza usynǵan.

Qolda bar aqparatqa qaraǵanda, Tımanýskaıa Eýropadan pana izdeýdi qarastyryp jatyr.

Halyqaralyq olımpıada komıtetiniń (HOK) ókili Mark Adamstyń aıtýynsha, oǵan japon bıligi kómektesip jatyr. Oǵan qosa, BUU bosqyndar agenttigi sıaqty halyqaralyq agenttikter sportshymen baılanysta bolǵan.

Belarýs ulttyq olımpıada komıteti bul másele boıynsha tolyq esep berýdi surady. Halyqaralyq olımpıada komıteti (HOK) men Japonıa bıligi qosymsha konsýltasıalar ótkizbek.

Halyqaralyq olımpıada komıteti (HOK) ótken jyly el prezıdenti Aleksandr Lýkashenkonyń daýly qaıta saılanýyna narazylyq bildirgennen keıin, oıyndar qarsańynda belarýs komıtetine qarsy sharalar qabyldaǵanyn habarlaǵan.

HOK keıbir belarýs sheneýnikterine, onyń ishinde prezıdenttiń balasyna sanksıa salǵan.

Jeksenbi kúni belarýs sportshysy eline qaıtsa, ómirine qaýip tónetinin málimdep, Tokıonyń Haneda termınalynda polıseılerden qorǵaýdy suraǵan.

Al Belarýstegi memlekettik BAQ sportshyny jappaı synǵa alýda.