Búgin «Ekpe al da, páter utyp al» naýqany óz máresine jetti. Basty syılyq Aqtaý qalasynan eki bólmeli páter Qaırat Qosaevqa buıyrdy, - dep habarlady mangystaumedia.kz saıty.

Bir jarym aıǵa sozylǵan naýqannyń qorytyndysy «Mangystau» telearnasynda tikeleı efırde ótti. Jeńimpaz atanǵan Qaırat Qosaev 94 jyly týǵan. Aqtaý qalasyna Túrikmenstannan kóship kelgen. Aıtýynsha, qazirgi tańda naǵashysynyń úıinde turyp jatyr. Al ata-anasy Túrikmenstannan kóship kelýdi josparlap otyr.

«Uıymdastyrýshylarǵa kóp raqmet. Bastapqy ýaqytta bul naýqanǵa senbegen edim. Qazir shynaıy ekenine kózim jetip otyr. Qýanyshtymyn. Jeke baspanam joq edi, endi ata-anam Aqtaýǵa kóship kelgende turatyn úıi daıyn. Tipti, qazir qýanyshtan qobaljyp otyrmyn», - deıdi jeńimpaz Qaırat Qosaev.

Qaırat Qosaevtyń aıtýynsha, Aqtaýǵa kelgenine 10 jyldaı ýaqyt bolǵan. Osynda oqyp, bilim alǵan. Osy ýaqytqa deıin «Carlsberg Kazakhstan» kompanıasynda merchendaızer bolyp qyzmet atqarǵan. Alaıda, eki kún buryn jumystan shyǵyp ketipti.

«Kópshilikpen jıi baılanys ornatyp, tyǵyz qarym-qatynasta bolatyndyqtan ekpe alýdy jón kórdim. Sebebi, pandemıa kezinde erkin júrip, jumys istep, aýrýdan aman bolýdyń jalǵyz amaly vaksına alý dep oılaımyn. Sondyqtan da erikti túrde ekpe aldym, ári qaraı osy konkýrsqa qatysyp, baǵymdy synap kórdim», - deıdi ol.

Sonymen qatar búgin baǵaly syılyqtardyń sońǵy legi tabystaldy. Nátıjesinde Quryq aýylynyń turǵyny Jeńis Ońǵarbaeva uıaly telefondy utyp aldy. Qysqatolqyndy pesh Aqtaý qalasynyń turǵyndary Erlan Bekdesinov jáne Shynar Sabýǵalıevaǵa buıyrdy. Al teledıdardyń birin Erkebulan Qaımer alsa, ekinshi teledıdardy Áset Elýbaı enshiledi. Tońazytqysh Salıma Seıfýllaeva esimdi turǵynǵa buıyrdy.

Eske sala keteıik, atalǵan naýqan 22 maýsym kúni óńir kásipkerleriniń qoldaýymen bastalǵan bolatyn. Maqsaty – ekpe alǵan turǵyndardy yntalandyrý. Osy ýaqytqa deıin 30-ǵa jýyq turǵyn túrli baǵaly syılyqtarǵa ıe boldy.

Uıymdastyrýshylardyń aıtýynsha, turǵyndar tarapynan usynystar túsetin bolsa, aldaǵy ýaqytta aksıany jalǵastyrýdy josparlap otyr.