AQSH–tyń burynǵy prezıdenti Donald Tramp tálipter Aýǵanstan astanasy Kabýldy basyp alǵannan keıin prezıdent Djo Baıdenniń otstavkaǵa ketýin talap etti. Bul týraly Anadolu Ajans agenttigi habarlady.

"Djo Baıden Aýǵanstanda bolǵan jaǵdaıǵa jol bergeni úshin uıalyp otstavkaǵa ketetin ýaqyty keldi" dep jazylǵan Tramp málimdemesinde.

Tramp sonymen qatar AQSH prezıdentin eldegi COVID-19 jaǵdaıynyń kóbeıgeni, ishki mıgrasıa, ekonomıka men energetıka úshin synǵa aldy.

– Djo Baıdenniń Aýǵanstanǵa jasaǵany Amerıka tarıhyndaǵy eń úlken jeńilistiń biri retinde tarıhta qalady, – dedi ol.

Aýǵanstanda ne boldy?

AQSH pen tálipter 2020 jyldyń aqpanynda halyqaralyq kúshterdi Aýǵanstannan shyǵarý týraly beıbit kelisimge kelgen. Proses osy jyly bastaldy.

Kelisim sheteldik kúshterge shabýyl jasamaýdy kózdegenimen, tálipterdiń Aýǵanstan qaýipsizdik kúshterine qarsy áreketine qatysty eshqandaı ereje qarastyrylmaǵan.

Tálipter Dohadaǵy Aýǵanstan úkimetimen kelissózderdi jalǵastyra otyryp, maýsymnan beri Aýǵanstannyń kóptegen aýdandary men provınsıalarynyń ortalyqtaryn basyp aldy.

El astanasy  Kabýldy qorshap alǵan tálipter úkimetke ákimshilik astanany beıbit jolmen berýge shaqyrǵan.

Tálipter Kabýldy basyp alǵannan keıin prezıdent Ashraf Ǵanı 15 tamyzda Aýǵanstannan qashyp ketken.

"Tálipter" qozǵalysynyń ókili Zabıhýlla Mýdjahıd úkimet kúshteri Kabýldan ketip bara jatqanda qala men qoǵamdyq ǵımarattardy baqylaýǵa ala bastaǵanyn aıtty.

Kabýldaǵy prezıdenttik saraıda jasalǵan málimdemede tálipter el astanasy men Aýǵanstanda ústemdik ornatatynyn málimdedi.

"AQSH Aýǵanstanǵa 5 myń ásker jiberdi"

Tálipter Kabýldy basyp alǵannan keıin AQSH prezıdenti Djo Baıden Aýǵanstanǵa qosymsha 5 myń ásker jiberdi. Ol áskerler aýǵandardy evakýasıalaýǵa kómektesedi.

Osylaısha Djo Baıden Kabýldaǵy jaǵdaı "óte aýyr" ekenin aıtty.