Aýǵanstan astanasy Kabýlǵa Talıban kúshteri kirgennen keıin elde beıbereket bastaldy. Qaladan ketkisi kelgen halyq Kabýl áýejaıynda jappaı jınalyp jatyr. Bul týraly Son Dakika basylymy habarlady.

Aýǵanstan úkimetimen qaqtyǵysta jeńiske jetken Talıban kúshteri 15 tamyz kúni Kabýlǵa kirgen. Prezıdent saraıyn basyp alǵan Talıban kúshteri "beıbit turǵyndarǵa tıispeımiz" degen málimdemesine qaramastan, myńdaǵan azamat qaladan ketkisi keledi. Olar túrli kedergilerge tap bolýda.

Talıban qozǵalysynyń basqynshylyǵyna baılanysty kóptegen elder óz azamattary men elshilik qyzmetkerlerin evakýasıalaýdy jalǵastyrýda. Evakýasıa jumystary júrgizilgen kezde, áýejaıda barlyq reıster toqtatyldy. Beıbereket kezinde birneshe adamnyń qaıtys bolǵany habarlandy. 

Áýejaıdaǵy haos sátteriniń kadrlaryn túsirgen kýágerdiń aıtýynsha, sheneýnikter men qart adamdardy jasyryn túrde ushaqqa otyrǵyzyp jatqany týraly qaýeset taraǵan. Muny estigen adamdar áýejaıǵa qaraı júgire bastaǵan.

Ushaqqa otyrǵyzý kezinde úlken keptelis boldy. Sol sátte qaýipsizdik kúshteri adamdardyń áýejaıǵa kirýine jol bermeý úshin aspanǵa oq atqan.

Aýǵanstandaǵy oqıǵadan keıin BUU-nyń Nú-Iorktegi shtab-páteri ǵımaratynyń aldynda narazylyq aksıasy ótýde. Aýǵan dıasporasynyń 100-den astam ókili "aýǵandyqtardyń ómiri mańyzdy" jáne "aýǵandyqtardy óltirýdi toqtatyńyz" dep urandatyp shyqty.

Olar "Talıbannyń" bılikke kelýine qarsy shyǵyp, Aýǵanstannan kelgen bosqyndar úshin AQSH shekarasyn ashýdy suraýda.