Birikken Arab Ámirlikterinde júrgen Aýǵanstan prezıdenti Ashraf Ǵanı elinen ketkeli alǵash ret resmı málimdeme jasady. Bul týraly áleýmettik jelidegi paraqshasyna jazdy.

Onyń aıtýynsha, qantógistiń aldyn alý úshin Kabýldan ketýge májbúr bolǵan. Ol prezıdent saraıynan keterde ózimen birge qomaqty qarajat alyp ketti degen aqparatty joqqa shyǵardy.

"Otandastarym, aýǵan halqynyń basyna túsken qıyn kezeńder tez arada aıaqtalady degen úmittemin. Elde beıbitshilik pen tynyshtyq ornaýy kerek.

Búgin men Birikken Arab Ámirlikterindemin. Eldiń Qorǵanys mınıstrliginen kómek suraǵanda ómirime qaýip tóngenin bildim.

Tálipter prezıdent saraıynyń tabaldyryǵynda turǵanda elden ketýden basqa amal qalmady. Batys elderindegi áriptesterim ketpesem, jaǵdaıdy ýshyqtyratynymdy aıtty.

Elde qalyp táliptermen soǵys bastasam, beıbit halyqtyń qany tógiler edi. Sırıa men Iemendegi qantógisti boldyrmaýdy sheshtim. Sondyqtan jaǵdaıdyń anyq-qanyǵyn bilmeı turyp, shyndyqqa kóz jetkizbeı turyp meni synamaýlaryńyzdy suraımyn.

Elden ketkende ústimdegi kıimnen basqa eshnárse áketken joqpyn. Meniń elden aqsha shyǵarǵanym jaıly aqparat shyndyqqa janaspaıdy. Taǵy aıtamyn, men qashqan joqpyn, men jaı ǵana halqymnyń aman qalýyn qaladym" dedi vıdeoúndeýde.