"Talıban" radıkaldyq qozǵalysynyń ókilderi 7 qyrkúıekte Kabýlda narazylyqqa shyqqan jergilikti halyqqa oq jaýdyrdy, dep habarlady Izvestıa aqparat agenttigi.

Vıdeoda tálipter sherýshilerdi taratý úshin aspanǵa birneshe ret oq atqany kórinedi. Beıresmı aqparattarǵa qaraǵanda, narazylyqqa shyqqan halyqty ustap áketken.

Buǵan deıin "Talıban"  qozǵalysynyń ókilderi  Aýǵanstan aýmaǵynda áýege oq atýǵa tyıym salǵan bolatyn. Narazylyqqa shyqqan aýǵandyqtar pákistandyqtarǵa qarsy urandar aıtyp, olar  Aýǵanstannyń ishki isterine aralasady dep aıyptaıdy.

Aýǵanstandaǵy jaǵdaı 2021 jyldyń mamyrynda amerıkalyq áskerlerdi shyǵarý bastalǵannan keıin shıelenise tústi. Talıban ókilderi eldiń iri qalalaryna shabýyl bastap, 15 tamyzda Kabýlǵa kirip, soǵystyń aıaqtalǵanyn habarlady.