Májilis tóraǵasy Nurlan Nyǵmatýlın parlamentterspıkerleriniń Besinshi Dúnıejúzilik konferensıasynda sóılegen sózinde Qazaqstan basshylyǵynyń aýqymdy reformalary, sondaı-aq zańnamalyq qoldaý elimizdi halyqaralyq ustanymdarǵa sáıkes damýyna múmkindik beretinin atap ótti, dep habarlady májlistiń baspasóz qyzmeti.

Májilis tóraǵasy Nurlan Nyǵmatýlın bastaǵan parlamenttik delegasıa osy kúnderi Avstrıa astanasy Vena qalasynda ótip jatqan parlamentter spıkerleriniń Besinshi Dúnıejúzilik konferensıasyna qatysýda.

Májilis spıkeri kópjaqty yntymaqtastyqty nyǵaıtý, beıbitshilik pen turaqty damýdy qamtamasyz etý úshin parlamenttik qyzmet taqyrybyna arnalǵan ınteraktıvti jalpy pikirtalastarda sóz sóıledi.

Osy rette, Nurlan Nyǵmatýlın bizdiń elimizdiń halyqaralyq ustanymdarǵa sáıkes turaqty damýǵa jol ashatyn Qazaqstanda qolǵa alynyp jatqan mańyzdy bastamalar týraly aıtty.

Palata spıkeri atap ótkendeı, Qazaqstannyń tuńǵysh prezıdenti Nursultan Nazarbaev yqpaldy memleket pen ádil qoǵam qurýdyń tujyrymdamalyq negizin qalady. Osy saıası baǵytty búginde prezıdent Qasym-Jomart Toqaev saıası jalǵastyryp keledi.

Nurlan Nyǵmatýlın qazaqstandyq qoǵamnyń barlyq salalaryn qamtıtyn aýqymdy júıeli reformalardy sóz ete kelip, qoǵamdyq baqylaý men azamattyq belsendilikti, sonymen birge elbasshylyǵynyń bastamalaryn zańnamalyq qoldaýǵa basa nazar aýdardy.

Óz sózinde Nurlan Nyǵmatýlın Qazaqstannyń jahandyq jáne óńirlik deńgeılerde beıbitshilik pen qaýipsizdikti qamtamasyz etýge qosqan úlesine kóńil bóldi.

Sonymen qatar, Nurlan Nyǵmatýlın halyqaralyq kún tártibindegi Aýǵanstandaǵy beıbitshilik pen qaýipsizdikti qalpyna keltirý sıaqty ózekti másele týraly aıta kelip, búgingi tańda eń mańyzdysy – Aýǵanstandaǵy gýmanıtarlyq jáne azyq-túlik daǵdarysyna jol bermeý ekendigine nazar aýdardy. Májilis Spıkeri qazirgi ýaqytta Qazaqstan Prezıdentiniń sheshimi boıynsha Aýǵanstanǵa járdemdesý jónindegi BUU Mıssıasy bizdiń elimizde ýaqytsha ornalastyrylǵanyn atap ótti.

Besinshi Dúnıejúzilik parlamentterspıkerleriniń konferensıasy koronavırýstyq pandemıa bastalǵannan beri tikeleı uıymdastyrylyp otyrǵan alǵashqy aýqymdy parlamentshiler forýmy.

Venadaǵy konferensıany Parlamentaralyq odaq, Avstrıa Parlamenti BUU-men birlesip uıymdastyrdy.

Álemniń 90-nan astam eliniń parlamentterspıkerleri jınalǵan jıynda-pandemıamen kúresý jáne covid-19-dan keıin qalpyna keltirý jónindegi jahandyq sharalardy qosa alǵanda, shuǵyl halyqaralyq parlamenttik is-qımyldy talap etetin basymdyqtar, klımattyń ózgerýi jáne ekologıalyq turaqtylyqty qamtamasyz etý máselelerin sheshý, jalǵa aqparat taratýǵa qarsy is-qımyl, jastardyń saıasatqa qatysýy, genderlik teńdik máseleleri qaraldy.

Qazaqstandyq parlament ókilderi delegasıasynyń quramynda senat pen májilis depýtattary bar.