Búgin 3 qyrkúıek kúni Aqtaý qalasynda 33-shi shaǵyn aýdanda ornalasqan 280 oryndyq 3 birdeı balabaqshanyń ashylýy ótti.
Balabaqshany Mańǵystaý oblysynyń ákimi Alık Aıdarbaev jáne NKOK kompanıasynyń basqarýshy dırektory Stefan de Maıe saltanatty túrde ashyp, lentasyn qıdy.
Saltanatty sharada oblys ákimi Aıdarbaev Alık Serikuly balabaqsha ujymyn, balalar men olardyń ata-analaryn áleýmettik nysannyń ashylýymen quttyqtady.
- Bıylǵy jyl – ulttyq tarıhymyzdy ulyqtaý jáne búgingi bıikterimizdi baǵalaý turǵysynan mereıli belester jyly. Qazaq handyǵynyń 550 jyldyǵy, Qazaqstan halqy Assambleıasy men Konstıtýsıamyzdyń 20 jyldyǵy, Uly Jeńistiń 70 jyldyǵy. Osyndaı merekeler toǵysqan berekeli kúz aıynyń alǵashqy kúninde NCOC kompanıasynyń qarjysyna salynǵan 3 birdeı «Álıa», «Mánshúk», «Hıýaz» balabaqshalary búldirshinderimizge arnap saltanatty túrde esigin ashpaqshy.
Elbasynyń «Balapan» baǵdarlamasynda kórsetilgen mindetterdi oryndaý maqstanda memlekettik balabaqshalar júıesi bıyldyń ózinde 5 birlikke ósip otyr.
Búgingi ashylǵaly otyrǵan 3 balabaqshaǵa qosa, 29 shaǵynaýdannan №61 «Sultan» jáne 12 shaǵynaýdannan №32 «Aqshaǵala» balabaqshalary ashý arqyly jańadan 1 400 balany balabaqshamen qamtamasyz etetin bolamyz.
Sonymen qatar qazirgi tańda buryn jalǵa berilgen 4 balabaqsha ǵımaratyn memleketke qaıtaryp, jobalyq-smetalyq qujattaryn daıyndaý úshin 16 mln. teńge qarjy qarastyryp otyrmyz.
Mektepter janynan shaǵyn ortalyqtar ashý jáne jekemenshik balabaqshalar ashý jumystary da qalamyzda qarqyndy júrgizilýde. Osyndaı josparly jumystardyń arqasynda biz jyldar boıy qalyptasqan balabaqsha kezegin azaıtyp, Elbasymyzdyń 2020 jylǵa deıin 3 pen 6 jas aralyǵyndaǵy balalarymyzdy balabaqshamen qamtamasyz etý týraly mindetin tolyǵymen oryndaımyz,- oblys ákimi Alık Serikuly.
Oblys ákimi Alık Aıdarbaev NCOC kompanıasynyń basshylyǵyna memlekettik baǵdarlamany qoldap, áleýmettik jáne ınfraqurylymdyq jobalar aıasynda oblys ortalyǵy Aqtaý qalasynan búldirshinderimizge arnap, sáni kelisken balabaqsha salyp bergenderi úshin barsha oblys turǵyndarynyń atynan alǵysyn bildirdi.
Qonaqtar balabaqsha ǵımaratymen tanysyp, tárbıelenýshilerdiń qýynysh tilekterin tyńdap, ónerlerin tamashalady.
Balabaqsha tolyǵymen qajetti oqý-ádistemelik quraldarymen jabdyqtalǵan. Onda 12 topqa arnalǵan jatatyn jáne oınaıtyn, jýynatyn bólmeleri bar. Sondaı-aq, balabaqsha qazaq tili, aǵylshyn tili, beıneleý jáne án-saz kabınetimen, tamaqtaný bólmesimen qamtylǵan. Balabaqsha 280 orynǵa eseptelgen. Onda 3-ten 6 jasqa deıingi balalar qabyldanady.
Aqtaý qalasy ákimdiginiń baspasóz qyzmeti.
