Ońtústik Qazaqstan oblysynda ǵımaraty apatty jaǵdaıda turǵan mektepter sany azaıdy. Jyl basynda óńirde komısıanyń sheshimimen rastalǵan osyndaı 46 mektep bar bolatyn. Bıyl solardyń 29-ynyń ornyna jańa ǵımarat salynyp jatyr. Jańa oqý jylyna deıin olardyń 20-sy paıdalanýǵa beriledi. Máselen, Túlkibas aýdanynda apatty jaǵdaıdaǵy mektepterdiń máselesi tolyǵymen sheshildi. 400-deı ǵana turǵyny bar Qarataýdyń bókterindegi Sarytór aýylynda jańa mekteptiń ashylǵanyna ásirese joǵary synypta oqıtyn qyzdar qýanyp júr. Kıim tigýmen aınalysatyn úıirme uıymdastyrmaqshy. Burynǵy mektepte oǵan bólek kabınet bolmaǵan eken. Aqtoty Madıar, oqýshy -Jańa mektebimizde fızıka, hımıa kabınetteri jeke-jeke bolady. Al eńbek kabınetinde mıshınkalar bar, qyzdarǵa arnalǵan. Munymen kıim tizemiz. Kerek zattarymyzdy sándi etip, tigip alamyz. Túlkibas aýdanynda eki mekteptiń ǵımaratyn komısıa apatty jaǵdaıda dep tanyǵan bolatyn. Ekeýiniń de ornyna bıyl jańa mektep salynyp, jańa oqý jylyn oqýshylar jańa mektepte bastap otyr. Eńbek aýylynda eski mektepti súrip tastap, ornyna jańa ǵımarat salyndy. Áskerbek Tórebekov, Eńbek aýylynyń turǵyny -Biz jańa mektep dep emes, balalarymyz qaýipsiz mektepke keldi dep qýanyp jatyrmyz. Eski mektepke jibergende qandaı bolady dep oılanyp júrýshi edik. Endi jańa mektepke kelip, bir qýanyp otyrmyz. Ońtústik Qazaqstan oblysynda bıyl 104 bilim nysanynyń qurylysy júrgizildi. Nátıjesinde mektebi joq eki aýylǵa mektep salyndy, 24 úsh aýysymdy mektep úsheýge azaıdy, 13 yńǵaılastyrylǵan ǵımarattyń ornyna jańasy turǵyzyldy. Endi aldaǵy eki jyldyń ishinde apatty jaǵdaıdaǵy mektepterdiń barlyǵynyń máselesi sheshiledi. Jergilikti bılik oǵan erekshe nazar aýdaryp otyr. Qaırat Ábdýálıev, Túlkibas aýdanynyń ákimi -Bul keleshek urpaq, balalarymyzdyń qaýipsizdigi. Jalpy, oqýshylardyń apatty jaǵdaıdaǵy mektepterde oqymaýy, 3 aýysymdy mektepte oqymaýy – bul úlken áleýmettik máseleniń sheshilýi. Bıylǵy oqý jylynda óńirdegi 1022 mektepte 602 myńnan astam bala bilim alady. Al 70 448 oqýshy mektep tabaldyryǵyn alǵash ret attamaq.
OQO ákiminiń baspasóz qyzmeti
