Ustazdardyń jaǵdaıyn jasap, olardy materıaldyq turǵyda qoldaýymyz kerek. Búgin óńirimizge arnaıy is-saparmen kelgen QR Bilim jáne ǵylym mınıstri Aslan Sárinjipovpen kezdesken oblys ákimi Beıbit Atamqulov óńirdegi úzdik ustazdardy baspanamen qamtý máselesin kóterip, mınıstrge usynys aıtty. Muǵalimderge memleket tarapynan jasalatyn kómek máselesin yjdaǵattylyqpen tyńdaǵan elimizdiń bas muǵalimi bul usynystyń jan-jaqty qaralatynyn aıtty. Oblystyń bilim salasyndaǵy túıtkildi problemalary men biliktiligi joǵary mamandardy daıarlaý máseleleri sóz bolǵan jıynda aımaq basshysy elimizdegi árbir úshinshi «Altyn belginiń» ıegeri Ońtústikten shyǵatynyn, UBT qorytyndysy boıynsha orta bal 78,8 bolyp, bilim salasy boıynsha respýblıka kóleminde aldyńǵy qatarda ekenin aıtty. Oblystaǵy joǵary kórsetkishterdi rastaǵan Bilim mınıstri óńirdegi 11 joǵarǵy oqý ornynyń stýdentteri Stýdentter lıgasy spartakıadasynda da belsendi ekenin rızashylyqpen málimdedi. Ońtústikke jasaǵan sapary barysynda Bilim mınıstri OQO Memlekettik pedagogıkalyq ınstıtýtyndaǵy jańa Stýdentter úıiniń ashylý saltanatyna qatysty. 500 orynǵa laıyqtalǵan 12 qabatty stýdentter úıin salýǵa memlekettik búdjetten 1 mıllard teńgeden astam qarjy jumsalǵan. Munda bolashaq pedagogtar úshin barlyq jaǵdaı jasalǵan. Nysan ishinde kitaphana, asqana, arnaıy medısınalyq kabınetter, hımıalyq tazartý bólimshesi, shashtaraz jáne taǵy basqa qyzmet kórsetý bólimderi ashylǵan. Qazaqstanda teńdesi joq jataqhanada bolǵan Aslan Sárinjipov árbir oqý ornynyń mańynda aqparattyq tehnologıalyq orta qurylyp, WiFi jelisi tegin tartylýy qajettigin aıtty. Sondaı-aq, joǵarǵy oqý oryndarynyń janynda alkogólsiz dámhanalar jumys isteýi kerek degen pikirin de jetkizdi.

OQO ákiminiń baspasóz qyzmeti