Oblystyń eń úzdik shańyraǵy. Shymkent qalalyq ardagerler keńesi tamasha bastama – «Mereıli otbasy» baıqaýynyń jalǵasy retinde ıgi shara uıymdastyrdy. «Úlgili otbasy». Ulttyq qundylyqty saqtap, salt-dástúrdi dáripteý birinshi kezekke qoıylǵan baıqaý osylaı dep atalady. Alǵashqy saıysta Shymkenttiń 7 otbasy baq synady. Bas júlde – Meldehanovtar shańyraǵynda.

Áıel – úıdegi yrysyń, ul – aıbarly qylyshyń, qyz – túzdegi órisiń, kelin – keńeıgen tynysyń».  Qazaq halqy yqylym zamannan beri otbasy qundylyǵyn joǵary qoıǵan. Elbasynyń bastamasymen qolǵa alynǵan «Mereıli otbasy» ulttyq baıqaýynyń oblystyq deńgeıdegi jalǵasy erekshe qyzdy. Shymshahardaǵy 4 aýdannyń turǵyndary qatysty.

Seıdahmet Baıdáýletov, qazylar alqasynyń tóraǵasy:

Bul baıqaý negizinen qalalyq ardagerler keńesiniń uıymdastyrýymen ótip jatyr. Ár aýdannan eki úmitker qatysady....

Úsenbekovter otbasynyń maqtanyshy da, aqylshysy da jasy júzdi alqymdaǵan Ulbala áje. Talaı náýbetti bastan keshken kónekóz qarıa áli tyń. Búgingi baıqaýda ájeı júnnen jip ıirdi.  Áýelete án saldy. Al, Ulbala ájeniń kindiginen taraǵan jalǵyz uly Ómirbek búginde asyl jary Roza ekeýi 4 ul-qyz tárbıelep, olardan 13 nemere súıip otyr.

Januıa músheleriniń sany jaǵynan ózge qarsylastaryn shań qaptyrǵan úmitkerlerdiń biri - Abdýllaevtar otbasy. Temirjolshylar dınastıasyna aınalǵan otbasynyń bul saladaǵy jalpylaı alǵandaǵy eńbek ótili 400 jylǵa ulasqan.

Shattyǵy tasyǵan shańyraq ıesi – toqsan bestegi  Juman qarıa. Soǵys ardageri. Qazynaly qart sahnada ulaǵatty áńgime órbitip, birqatar saýaldarǵa ázilmen  jaýap berdi.

Otbasy – qoǵamnyń altyn dińgegi. Elin, jerin súıetin azamatty qalyptastyratyn orta ol – qazaqtyń qara shańyraǵy. Sebebi, Otan – otbasynan bastalatynyn eskersek, mundaı baıqaýdyń mańyzdylyǵy joǵary.

 "Qazaqstan-SHymkent" telearnasy