Aýǵanstannyń Gerat qalasy mańynda bala-shaǵasyn ash qaldyrmas úshin kóp balaly otbasy jańa týǵan nárestesin satýǵa májbúr bolǵan, dep habaralady Bı-bı-sı aqparat agentti.

BUU eger jaqyn arada elge jedel kómek kórsetilmese, mıllıondaǵan adam ashtyqtan qaıtys bolady dep qatań eskertý jasady. 

– Úıde ne un, ne maı joq. Solaı isteýge májbúr boldyq, – dedi náresteniń ákesi.

BBC saıtynyń jazýynsha, náresteni 500 dollarǵa satqan. Bul aqshaǵa otbasy birneshe aı kún kóre alady. Jańa týǵan náreste júre bastaǵan kezde ony satyp alýshyǵa beredi. Satyp alýshy ony eseıgen soń ulyna úılendiretinin aıtqan. Biraq ýádesinde turatynyna esh kepildik joq.

Aqparat agenttiginiń habarlaýynsha, bul osylaı isteýge májbúr bolǵan Aýǵanstandaǵy jalǵyz otbasy emes.

– Aýǵanstan aýyr gýmanıtarlyq daǵdarysty bastan keshirip otyr. Apat bolaıyn dep tur, – dedi BUU Azyq-túlik baǵdarlamasynyń atqarýshy dırektory Devıd Bızlı.

Eske salaıyq, tamyz aıynda shetel áskeri ketkennen keıin Aýǵanstan bıligi "Talıban"  radıkaldy qozǵalysynyń qolyna ótken. Álemniń bir de bir memleketi onyń bıligin moıyndaǵan joq.

Sonyń saldarynan Aýǵanstan Eýropa elderi, Dúnıejúzilik bank pen Halyqaralyq valúta qorynyń kómeginen qaǵyldy. Shetel qarjysy JİÓ-niń 40 paıyzyna jetken.

Qazir elde azyq-túlik, dári-dármek daǵdarysy ornady. Azyq-túlik quny kúrt ósti. Odan bólek, Aýǵanstanda sońǵy tórt jylda ekinshi ret qýańshylyq ornaǵan. BUU aqparatynsha, sonyń nátıjesinde kún saıyn aýǵan otbasylarynyń tek bes paıyzy ǵana toıyp tamaq ishedi.

Qyrkúıekte Jenevadaǵy konferensıa kezinde halyqaralyq qaýymdastyq aýǵan azamattaryna kómek qolyn sozý úshin mıllıard dollardan astam qarjylaı kómek beretinin málim etken. Bul aqshanyń úshten biri BUU-nyń Azyq-túlik baǵdarlamasyn júzege asyrýǵa jumsalady. Alaıda Dúnıejúzilik azyq-túlik baǵdarlamasy ázirge qarajattyń tek bir bóligi ǵana túskenin jáne onyń teńiz tamshysyndaı áser beretinin habarlaıdy.