Shymkent qalasy Qarataý aýdany «Ormanshy» eldimekenindegi burynǵy qurylys qaldyqtary polıgony aýmaǵy búginde demalys ornyna aınaldy. Qurylys jumystary qyrkúıek aıynda tolyǵymen aıaqtaldy.

Taıaýda qala ákimi M.Áıtenov abattanǵan nysandy aralap, qurylystyń sapasymen tanysqan bolatyn.

Búgin eldimekende demalys ornynyń saltanatty ashylý rásimi ótti. İs-sharaǵa Qarataý aýdany ákimi orynbasary A.Parmanov, Qarataý aýdanynyń ardagerleri jáne BAQ ókilderi qatysty.

Turǵyndar tarapynan bul demalys ornyn «Alataý» dep ataý usynyldy. Eldimeken turǵyndary jyldar boıy qoqys polıgonynyń ıisi men tútegen tútininen zardap shekken kezderin eske alyp, búginde bul másele oń sheshimin tapqanyna qýanyp otyr.

Demalys ornynyń aýdany 4,48 gektardy quraıdy. Onda balalarǵa arnalǵan oıyn jáne sport alańshalary ornalasqan. Sondaı-aq, jaryqtandyrý baǵanalary, oryndyqtar, qoqys ýrnalary jáne ár túrli pishinde kishi sáýlet músinderi ornatylǵan.