Shymkent qalasynda jyl sońyna deıin zeınetkerlerge arnalǵan belsendi ómir súrý ortalyqtary ashylady. Qart adamdardyń densaýlyǵyn qoldaý jáne bos ýaqytyn tıimdi ótkizýdi uıymdastyrý mekemeleri megapolıstiń 4 aýdanynda jumys isteıtin bolady. Bul jumystar qarttardy qoldaýǵa arnalǵan 2025 jylǵa deıingi jospar aıasynda júzege asyrylmaq.

Búgin qala ákiminiń orynbasary Erǵalı Bilisbekov aldaǵy ýaqytta ashylatyn zeınetkerler men kópbalaly analarǵa áleýmettik qyzmet túrlerin usynatyn ortalyqtardy tekserip ótti.

Erǵalı Bilisbekov birinshi kezekte ǵımaratta talapqa saı zamanaýı dızaın, pandýs, jeldetkish, lıft pen kólik turaǵyna deıin yńǵaıly bolýy kerektigine toqtaldy.

Shymkent qalasy jumyspen qamtý jáne áleýmettik qorǵaý basqarmasynyń basshysy B.Narbekova qazirgi tańda zeınet jasyna jetken azamattarǵa «Asyl Júrek» áleýmettik-medısınalyq ortalyǵy jartylaı stasıonarlyq jaǵdaıynda arnaýly áleýmettik qyzmetter kórsetilip keletinin baıandady.

Ortalyqqa kelýshilerge joǵary jáne birinshi sanatty dáriger kardıolog, terapevt, nevropatolog jáne fızıoterapevt dárigerleri qyzmet kórsetedi. Sonymen birge emdik deneshynyqtyrýdan bastap ıoga, bı, bılárd, ústel tenısi, trenajerlyq jattyǵýlar da qarastyrylǵan. Qyzmet alýshylardyń kıno, sensorlyq bólme, kitaphanada demalýǵa da múmkinshilikteri bar. Psıholog mamanynan keńes alyp, psıhologıalyq trenıńterge qatysa alady.