Shymkentte turǵyndardyń sapaly ári tıimdi, ýaqyt únemdeı otyryp qyzmet alýyna jaǵdaı jasaý maqsatynda «I-shymkent» elektrondy portaly iske qosyldy. Onda komýnaldyq sharýashylyq qyzmetter avtomattandyrylǵan rejımde jumys jasaıdy. 50 qyzmet pen servıster iske qosylǵan.

Qala ákimi Murat Áıtenov jyl sońyna deıin taǵy 20 qyzmet qosylatynyn aıtty. Máselen turǵyndar «Energopotok», «Ońtústik jaryq tranzıt», «Sý-resýrstar marketıńi» sekildi komýnaldyq qyzmet kórsetýshilerge ótinish qaldyra alady, keńes alý, memlekettik jáne kásipkerlik qyzmetter, azamattardy sıfrlandyrý baǵytynda onlaın oqytý júıege engen. Aldaǵy ýaqytta «109 Aıkómek-SHymkent» ortalyǵynyń jumysy da biriktirilmek.

Atalǵan qyzmetterdi offlaın túrde kórsetetin front-ofıs te ashylyp jatyr. Ol jerde 10 qyzmetker jumys atqaratyn bolady. Nátıjesinde azamattar onlaın jáne offlaın da qyzmet alýyna múmkindik týady.