Shymkent qalasynyń ákimi Murat Áıtenovtiń tóraǵalyǵymen ınvestısıalyq shtabtyń kezekti otyrysy ótti. Jıynda jańa jobalar men ózekti máseleler, 2021 jyldyń 9 aıynda negizgi kapıtalǵa salynǵan ınvestısıalardyń ıgerilýi jáne hattamalyq tapsyrmalardyń oryndalý barysy talqyǵa tústi.

«Zoom» júıesi arqyly ınvestorlar jańa jobalaryn usyndy. Negizinen qurylys, saýda, áleýmettik nysandar, kópqabatty turǵyn úı baǵytynda, jalpy 10-nan astam joba tanystyryldy.

Atap aıtqanda, transformator jáne elektr tehnıkalyq qurylǵylar óndirý zaýyty, «Qurylys Servıs – SK» JSHS temir-beton buıymdary, Luhta kompanıasynyń kıim saýda úıi, «Melnıchno-promyshlennaıa kompanıa» JSHS qoımalar, saýda jáne logıstıkalyq ǵımarattar, «S.V.U.group» JSHS avtosalon jáne avtoqyzmet, «GREEN CROSS ECO» JSHS ınsýlındi ıneler óndirisi, «NTR» JSHS-niń kópqabatty turǵyn úı, Saıram turǵyn alabynda 1200 oryndyq mektep qurylysy, 1200 orynǵa laıyqtalǵan zıatkerlik Diplomat School mektebi qurylysy jobalary usynyldy.

«Tassaı» ındýstrıaldy aımaǵynda ornalasqan «GREEN CROSS ECO» JSHS jylyna 200 mln dana shprısterge arnalǵan ınsýlındy ıneler shyǵarýǵa múmkindigi bar. Búginde qurylys montaj jumystary 100 % tolyq aıaqtaldy. Qazir ıjenerlik júıelermen qamtý jumystary atqarylýda.

Joba quny 600 mln teńge quraıtyn temir-beton buıymdary óndirisiniń basshylary ınfraqurylym júıelerin tartyp berýdi surady.
Al transformator jáne elektr tehnıkalyq qurylǵylar jobasyn 2022 jyly júzege asyrý josparlanyp otyr. 1,02 mlrd teńge ınvestısá tartylmaq. Kásipkerlerge «Ońtústik» arnaıy ekonomıkalyq aımaqtan jer berý qarastyrylýda.

Jańa óndiris oryndary qalamyz úshin mańyzdy ekenin aıtqan qala basshysy usynylǵan jobalarǵa qoldaý kórsetiletinin aıtty.