Ózgeden buryn ózimizdi jarylqaýǵa tıispiz. Májilis depýtattary halyqtyń kóshi-qon zańnamasyn talqylaý kezinde osylaı ashynyp sóıledi. Bul týraly «Qamshy» portaly nur.kz-ke silteme jasaıdy.
Qazaq eline bosqyndardyń ornyna qany bir qandas aǵaıyndardy ákelý kerektigin qadap aıtty. Olardy bir-birlep emes, aýylymen túgel kóshirý máselesi sóz etildi.
Qazaqtyń basyna qara bult úıirilse, jeme-jemge kelgende kómek qolyn sozar tek qazaq qana. Azýly AQSH-tyń bosqyndardy Orta Azıaǵa qonystandyrý usynysyn bizdiń depýtattar qoldamaıtyn bolyp shyqty. Olar biraýyzdan tórtkúl dúnıede tarydaı shashylǵan 5 mıllıon qazaqty áýeli jarylqap alaıyq dedi.
Qonysyn aýdarýǵa ketken shyǵyndary men turǵyn úı máselesin sheshýdiń ońtaıly joldary usynyldy. Endi jańa ózgertýlerge sáıkes, oralmandar tutas aýylymen kóship kelýge múmkindik týyp otyr.
«Biz zańnamanymyzdy retteımiz dep jatqanda oralmandardyń ornyna bosqyndarǵa jol ashyp bermeımiz be degen qaýip bar mende. Qorqamyn. Sol úshin bul máselege tereń qarap, shet eldegi elshilerdiń basyn qosyp, jer bólip, qıyndyq kórmeıtindeı turýǵa jaǵdaı jasaýǵa shaqyramyn»,- deıdi depýtat Serikbaı Nurǵısaev.
Oralmandarǵa azamattyq berý merzimi de naqtylandy. Endi elin ańsap kelgen ár qazaq yhtıarhat alǵannan keıin bir jyl ishinde el azamaty mártebesin ıemdenedi.
«Azamattar qaı aýdanǵa kelgenine qaramastan, biz oralman mártebesin beremiz. Bir jylǵa deıin onyń oralman máselesi toqtatylmaı turady. Ol osy ýaqyttan keıin Qazaqstannyń azamaty bolady. Eger osy ýaqytta almasa, onda sheteldik azamat retinde tura beretin bolady»,- dedi Densaýlyq saqtaý jáne áleýmettik damý mınıstri Tamara Dúısenova.
Jekeshelendirýge jatatyn 60 iri kompanıanyń taǵdyry da talqyǵa salyndy. «Áleýmettik mańyzy bar nysandarymyz ustaǵannyń aýzynda kete me degen qaýip jurtty alańdatpasyn. Bári baqylaýda» dep sendirdi Ulttyq ekonomıka mınıstri Erbolat Dosaev.
«Barlyq obektilerdi bitirgennen keıin kórsetemiz. 60-tan basqa taǵy qandaılarynyń qosylatyndyǵyn da aıtamyz. Ádeıi sheteldik sarapshylardy shaqyramyz, ashyq, qalaı satylady, qandaı jolmen satylatyndyǵyn kórsetemiz»,- dedi Ulttyq ekonomıka mınıstri Erbolat Dosaev.
