AQSH Reseıdi Halyqaralyq ǵarysh stansıasyna (HǴS) qaýip tóndirgen "qaýipti jáne jaýapsyz" zymyran synaǵy úshin aıyptady.

Synaqta Reseı jeke spýtnıkteriniń birin jaryp jibergen. Saldarynan HǴS ekıpajy kapsýlalardy panalaýǵa májbúr bolǵan.

Qazirgi ýaqytta stansıa bortynda jeti ekıpaj múshesi bar: olardyń tórteýi amerıkalyq, bireýi nemis jáne ekeýi reseılik.

Ǵarysh stansıasy shamamen jer betinen 420 km bıiktikte Jersharyn aınalady.

"Búgin Reseı Federasıasy jerserikterge tikeleı soqqy beretin zymyran synaǵyn júrgizdi. Synaq 1500-den astam baqylanatyn orbıtalyq qoqys pen júzdegen myń dana kishigirim orbıtalyq qoqystardy túzdi. Olar qazir barlyq elderdiń múddelerine qaýip tóndiredi" dedi AQSH memlekettik departamentiniń ókili Ned Praıs brıfıńte.

NASA ákimshisi Bıll Nelson bul oqıǵaǵa ashýly ekenin aıtty.

– Reseı HǴS-taǵy amerıkalyq jáne halyqaralyq seriktes ǵaryshkerlerge ǵana emes, sonymen birge ózderiniń ǵaryshkerlerine, sondaı-aq Qytaıdyń ǵarysh stansıasyndaǵy qytaılyq "taıkonavttarǵa" qaýip tóndirýi múmkin, – dedi Nelson málimdemede.