Shymkent qalasynyń ákimi Murat Áıtenovtiń tóraǵalyǵymen áleýmettik áriptestik pen áleýmettik jáne eńbek qatynastaryn retteý boıynsha komısıa otyrysy ótti. Jıynda eńbek qatynastary salasyndaǵy aǵymdaǵy jaǵdaı, áleýmettik áriptestik pen áleýmettik jáne eńbek qatynastaryn retteý boıynsha komısıanyń atqarǵan jumystary qorytyndylandy.

Bıyl úshjaqty komısıanyń 15 otyrysy ótip, áleýmettik-eńbek salasynyń ózekti máseleleri talqylandy. Eńbek qatynastaryn retteý boıynsha jeke tulǵalardyń 831 aryz-shaǵymdary men ótinishteri zańǵa sáıkes qaralyp, tıisti jaýaptary berildi.

Memlekettik eńbek ınspektorlarymen 172 tekserý júrgizilip, 254 zańbuzýshylyq anyqtaldy. Tekserý nátıjelerimen 7,9 mln teńge kóleminde aıyppul salynyp, 5,8 mln. teńge aıyppul óndirilgen. Sonymen qatar, jyl basynan beri 56 kásiporyndaǵy 2121 jumyskerdiń 230,5 mln teńge kólemindegi jalaqy qaryzdary óteldi. 2021 jyldyń 1 qazandaǵy jaǵdaı boıynsha túzilgen jáne jumys istep turǵan ujymdyq sharttyń sany 1505-ke jetti. Qala ákimi M.Áıtenov áleýmettik áriptester belsendi jumys júrgizýi qajet ekenin atap ótti.

– Áleýmettik shıelenisti týdyratyn, jalaqy qaryzdary, eńbek zańnamasynyń buzylýy sıaqty suraqtar bizdiń kún tártibimizden túspeıtini anyq. Birlese qala aýmaǵyndaǵy áleýmettik-ekonomıkalyq máselelerdi sheshý boıynsha keshendi jumystar júrgizýimiz qajet. Qaýipsizdik talaptaryna saı eńbek etý – bul árbir turǵynymyzdyń Konstıtýsıalyq quqyǵy. Sondyqtan, birinshi kezekte kásiporyndarda eńbek qaýipsizdiginiń saqtalýy, eńbekti qorǵaý sharalarynyń tıimdiligin arttyrý qajet, halyqaralyq tájirıbelerge súıene otyryp, tıimdi áreketterdi qoldaný múmkindikterin qarastyrǵan jón.
Qalada 112 kásiporyn eńbek qaýipsizdigi jáne eńbekti qorǵaý boıynsha halyqaralyq jáne ulttyq standarttardy engizgen, 3 kásiporynnyń qyzmeti deklarasıalanyp, «Senim sertıfıkaty» berilgen. Áleýmettik áriptester osy baǵytta belsendi jumys júrgizýi tıis. Jalaqy qaryzdaryn boldyrmaý, óndiristerdegi jaraqattaný deńgeıin tómendetý – bizdiń eń basty basymdyǵymyz. Barlyǵyńyzdy belsendi áreket etýge shaqyramyn, – dedi qala ákimi.

Sonymen qatar, komısıa otyrysynda memlekettik eńbek ınspeksıasy basqarmasynyń basshysy B.Qaljanov, «Shymkent qalasynyń «Kásipodaqtar ortalyǵy» aýmaqtyq kásipodaqtar birlestigi tóraǵasy B.Álteev atqarylǵan jumystar jóninde baıandama jasady.

Komısıanyń búgingi otyrysy «Eńbek kúni» merekesiniń qarsańynda uıymdastyrylǵandyqtan «Eńbek joly» jáne «Paryz» konkýrstarynyń nomınasıalary boıynsha óńirlik deńgeıdegi jeńimpazdary marapattaldy.
Sondaı-aq, jıynda memlekettik eńbek ınspeksıasy basqarmasynyń uıymdastyrýymen eńbek qaýipsizdik qural-jabdyqtary tanystyryldy.