Shymkent qalasynyń energetıka jáne ınfraqurylymdy damytý basqarmasynyń basshysy B.Býlatbekov qala ákimdiginiń @akimat_shymkent ınstagram paraqshasynda tikeleı efırde suhbat berdi.

Basqarma basshysy qalada elektr qýatynyń jıi sónýiniń negizgi sebepterine toqtalyp, jalpy qalany sapaly elektr qýatymen jáne aýyzsýmen qamtý jumystarynyń barysyn baıandady. Tikeleı efır barysynda turǵyndar tarapynan áleýmettik jeli arqyly kelip túsken saýaldarǵa jaýap berdi.

Shaharda 11 qarashadan bastap elektr energıasy shektelmeıdi. Qala turǵyndaryna qolaısyzdyq týdyrǵan bul máseleni sheshý maqsatynda Jambyl GRES-ten qosymsha 70 MVt elektr energıasyn alýǵa kelisimshart túzildi.
– Qala turǵyndaryn sapaly elektr qýatymen qamtý maqsatynda bıyl barlyǵy 16 eldimekende (barlyǵy 20 nysan) qurylys jumystary qolǵa alyndy. Búginge deıin Qarabastaý eldimekenindegi 100-ge jýyq abonent elektr qýatymen qamtyldy. Sondaı-aq, «1-M-1» qosalqy stansıasynyń qurylysyn aıaqtap, qazirgi ýaqytta iske qosýǵa daıyndyq júrgizilýde. Onyń nátıjesinde, Asar-2 eldimekeni turǵyndaryn sapaly elektr qýatymen qamtamasyz etetin bolamyz, – dedi B.Býlatbekov.

Jalpy jyl sońyna deıin, 7 eldimekende (Dostyk, Jalyn, Aqjar, Yntymaq-2, Aıkól, Igilik, Táýelsizdikke 20 jyl) qurylys jumystary aıaqtalyp, 21,3 myńǵa jýyq adam sapaly elektr qýatymen qamtamasyz etiledi.

Sondaı-aq, basqarma basshysynyń málimdeýinshe, qala turǵyndaryn sapaly aýyzsýmen qamtý maqsatynda barlyǵy 14 nysannyń qurylysy júrgizilýde. Qazirgi ýaqytta Turan, Yntymaq-2, Aqtas-2 jáne Sáýle (276 – oram), Jańatalap, Asar-2 eldimekenindegi qurylys jumystary aıaqtalyp, turǵyndardy sýǵa qosý jumystary bastaldy.

Batys, Soltústik saıajaı jáne Nurtas eldimekenderinde sý qubyry tolyq júrgizilip, qazirgi ýaqytta qubyrlar synaqtan ótkizildi jáne sý eseptegish qurylǵysy ornatylýda. Atalǵan jumystar qarasha aıynyń sońyna deıin aıaqtalyp, atalǵan eldimekenge de sý berý jumysy bastalady. 2021 jyldyń josparyna sáıkes, qalada aýyzsýyn tasymaldaıtyn eldimekenniń barlyǵy 100 paıyz qamtylyp, sapaly aýyzsý beriledi