QR Premer-Mınıstri Asqar Mamınniń tóraǵalyǵymen ótken Úkimet otyrysynda sanıtarıalyq-epıdemıologıalyq jaǵdaı, aýyldyq eldimekenderde sýmen jabdyqtaý qyzmetterin qoljetimdi etý jáne joǵary bilim berý sapasyn arttyrý máseleleri qaraldy.

Úkimet basshysy halyqty vaksınalaýmen jáne revaksınalaýmen qajetti kólemde qamtamasyz etýdiń mańyzdylyǵyn atap ótti.

DDSU usynysy boıynsha elimizde vaksınalaýǵa jatatyn adamdar sanaty keńeıýde. Búginde jeti óńirde jasóspirimderdi, júkti jáne bala emizetin analardy vaksınalaý bastaldy. Óńirlerge Comirnaty (Pfizer) vaksınasy jiberilgen. Shymkent qalasynda da atalǵan vaksınany egý jumystary júrgizilýde.
Qazirgi ýaqytta respýblıka boıynsha 12-18 jastaǵy 1313 bala, 247 júkti jáne bala emizetin ana vaksınalandy.

Úkimet basshysy sanıtarlyq talaptardy qamtamasyz etý jáne monıtorıńtik toptardyń olardy saqtaýyn baqylaý boıynsha sharalar qabyldaýdy odan ári jalǵastyrýdy tapsyrdy.

Sonymen qatar, jıynda aýyldyq eldimekenderde sýmen jabdyqtaý qyzmetterin qoljetimdi etý jumystarynyń barysy talqyǵa tústi. 2025 jyldyń sońyna deıin halyqty taza aýyzsýmen qamtýdy 100 paıyzǵa jetkizý mindeti tur. 2021 jyldyń qorytyndysy boıynsha qalalarda aýyzsýmen qamtý 98 paıyzǵa jetpek.

Nur-Sultan jáne Shymkent qalalarynda óndiristik prosesterdi avtomattandyrý jáne esepteý qurylǵylaryn ornatý esebinen turǵyndardyń qarajaty únemdelip, sý jáne qyzmet kórsetý shyǵyndary azaıǵan. QR Premer-Mınıstri osyndaı tásilderdi eldiń basqa óńirlerine de qoldaný qajettigine nazar aýdardy.
Salany avtomattandyrý jáne ınovasıalyq tehnologıalardy qoldaný boıynsha jumys qarqynyn arttyrý qajet.

Aıta ketsek, Shymkent qalasynda 2023 jyly sapaly aýyzsýmen qamtý máselesi tolyqtaı sheshiledi.