Seısenbi, 5 qazan kúni oblys ákimi Ońdasyn Orazalınniń tóraǵalyǵymen oblystyq tótenshe jaǵdaılardyń aldyn alý, joıý jónindegi jáne oblystyq terrrorızmge qarsy komsıssıalardyń birlesken otyrysy ótti.

Jıynǵa oblys prokýrory, quqyq qorǵaý organdary, tótenshe jaǵdaı departamenti men salaǵa jaýapty basqarma basshylary qatysty. Otyrysta sýǵa shomylý jáne órt qaýipti maýsymdary, qysqy kezeńge avtomobıl joldaryn daıyndaý, máseleleri qaraldy.

Oblystyq tótenshe jaǵdaılar departamentiniń bastyǵy M.Amanbaevtyń aıtýynsha, órt qaýipti kezeńde oblys aýmaǵynyń dala alqaptarynda jalpy 5500 gektardan astam aýmaqta 240 janý oqıǵasy bolǵan. Sonymen qatar, sońǵy 2 jylda jazǵy mezgilde sýǵa shomylý maýsymynda qabyldanǵan sharalarǵa qaramastan, sýdaǵy qaıǵyly jaǵdaılar oryn alǵan. Sýda qaza tabýdyń negizgi sebepteri tyıym salynǵan jerlerde mas kúıinde shomylý, júze almaý jáne balalardy qaraýsyz qaldyrý bolyp otyr.

Oblystyq quqyqtyq statısıka jáne arnaıy esepke alý jónindegi basqarma bastyǵy S.Ábdenovtiń baıandamasynda kórsetilgendeı, azamattardy ózekti aqparatpen qamtamasyz etý maqsatynda Komıtetpen qamqor.gov.kz saıtynda aqparattyq servıs qurylǵan. Aqparattyq servıste ınternet jelisine qoljetimdiligi bar azamattar 20-ǵa jýyq quqyqtyq statısıka, qylmystar týraly ótinishterdi baqylaý, qylmystylyq kartasy, jol-kólik oqıǵalary kartasy, ákimshilik quqyq buzýshylyqqa shaǵym jasaý syndy aqparattyq qyzmetterden ózine qajetti málimetterdi ala alady.

Aımaq basshysy baıandamashylardy tyńdap, jaýapty sala basshylaryna tótenshe jaǵdaılardyń aldyn alý jáne qysqa daıarlyq jumystaryn júrgizý jóninde birqatar naqty tapsyrmalar berdi.