«Nur Otan» partıasynyń saılaýaldy baǵdarlamasyn oryndaý jónindegi Jol kartasynyń júzege asyrylý barysy oblys ákimi Ońdasyn Orazalınniń tóraǵalyǵymen ótken partıanyń aımaqtyq fılıalynyń Saıası keńes Búrosy otyrysynda talqylandy. Jıynda jyl basynan beri 33 nysan ashylyp, eldiń áleýetin kóterýge múmkindik jasalǵany aıtyldy.

Otyrysqa Saıası keńes Búrosynyń jáne óńirlik qoǵamdyq keńes músheleri, oblystyq departament, basqarma basshylary, qala, aýdan ákimderi qatysty. Kún tártibindegi máseleler boıynsha partıanyń Aqtóbe oblystyq fılıaly tóraǵasynyń birinshi orynbasary Erbol Danaǵulov pen oblystyq ekonomıka jáne búdjettik josparlaý basqarmasynyń basshysy Gúlqasıma Súıintaevanyń bandamasy tyńdaldy.

Jalpy Aqtóbe oblysynda Jol kartasy aıasynda jyl basynan beri 488,1 myń sh. m. turǵyn úı salynyp, 26 427 jańa jumys orny qurylǵan. Baǵdarlamaǵa sáıkes, óńirde 33 nysan ashyldy. Onyń ishinde 3 mektep, 4 balabaqsha 3 sport nysany, medısınalyq pýnkt pen ambýlatorıa, aýyldyq klýb bar. Sondaı-aq qurylys materıaldaryn óndirý zaýyty, sút óndirý fermasy jáne sút ónimderin óndirý sehy, mal bordaqylaý alańdary, kókónis saqtaý qoımasy men jylyjaı iske qosyldy. Tek Qandyaǵash qalasynyń ózinde birneshe nysan - gemodıalız ortalyǵy, jıhaz sehy, suıyq sabyn óndirý sehy, qurylys dúkeni, dárihana salynyp, paıdalanýǵa berildi. Búginge kúnge deıin Jol kartalarynyń 443 kórsetkishi júzege asqan.

-Jol kartalarynyń oryndalýyna Saılaýaldy baǵdarlamalardy júzege asyrý aıasynda qurylǵan Qoǵamdyq keńester óz septigin tıgizýde. Keńes músheleriniń barlyǵy Jol kartasyn iske asyrýdy uıymdastyrýǵa tartylyp, jumystaryn sapaly atqaryp keledi. Qazirgi tańda óńirlik keńesterdiń 37 otyrysy jáne aýmaqtyq keńesterdiń 288 otyrysy ótip, memlekettik mekemelerge 526 usynys berildi. Fraksıa jáne keńes músheleri aýdandarǵa shyǵyp, "Jol kartasy" aıasyndaǵy nysandarǵa monıtorıń júrgizýde. Halyqqa bergen ýádemizdi sapaly iske asyrý qatań partıalyq baqylaýda, - dedi partıanyń oblystyq fılıaly tóraǵasynyń birinshi orynbasary Erbol Danaǵulov.

Saılaýaldy baǵdarlamadaǵy jumystar óte aýqymdy bolǵandyqtan qıyndyqtar men máseleler de kezdesýde. Jıynda bul týraly ashyq aıtyldy. Partıanyń Saılaýaldy baǵdarlamasyn júzege asyrýda kemshilikterge jol bergen Aqtóbe oblysynyń jolaýshylar kóligi jáne avtomobıl joldary basqarmasy basshysy Aıbek Qaıyrǵa, Aqtóbe oblysynyń veterınarıa basqarmasynyń basshysy Qusaıyn Sarsembaıǵa, Baıǵanın aýdanynyń ákimi Qaırat Otarovqa partıalyq sógis jarıalandy. Oblys ákimi endi osyndaı qatelikterge jol bergen memlekettik qyzmetshilerge qatań tártiptik jaza qoldanylatynyn eskertti.

-Partıanyń bas jospary halyqqa qajetti naqty jobalardan quralǵan. Sondyqtan da biz ındıkatorlardy ýaqytynda sapaly oryndaý arqyly eldiń áleýetin kóterýge, árbir turǵynnyń ómir súrý sapasy men ál-aýqatynyń jaqsarýyna jumystanýymyz qajet. Bizdiń negizgi mindetimiz – saılaýaldy ýádelerdi oryndaý jáne saılaýshylardyń senimin aqtaý, –dedi Ońdasyn Orazalın.

Jıyndy qorytyndylaǵan oblys ákimi barlyq aýdan, qala ákimderi men basshylarǵa bul iske jaýapkershilikpen qaraýdy qatań tapsyrdy.