Germanıanyń Oderdegi Frankfýrt qalasynda «Brandenbýrg kýbogy» dep atalatyn týrnır aıaqtaldy. 17-18 jas aralyǵyndaǵy 20 memleketten kelgen 128 boksshynyń basyn qosqan jarysta Qazaq eliniń ánurany eki márte shyrqaldy.

Osy jarysta 52 keli salmaqta baq synaǵan Aıdos Arapov ózin jaqsy qyrynan kórsete bildi. Bastapqy básekelerde barlyq qarsylastaryn edáýir upaı aıyrmashylyǵymen utqan Qos­tanaı oblysynyń ókili jartylaı fınalda reseılik Robert Rodıo­novtan aılasyn asyrsa, aqtyq aıqasta ırlandıalyq Shanne Flavınnen basym tústi. Koman­dalyq áriptesiniń jeńisti jolyn Ádilhan Amanqul jalǵastyrdy. 75 keli salmaqta óner kórsetken Tarazdyń tastúlegi sheshýshi tusta Reseı boksshysy Jamal Mah­mýdov pen Fransıanyń myqtysy Lýıs Toıtındi tize búktirdi. Osy­laısha, nemis jerinen qazaqtyń daryndy jastary qos altyn medalmen oraldy. 
Jalpy esepte Germanıa qu­ramasy ozdy. Jarys qojaıyn­dary 5 ret bas júldeni oljalady. Ekinshi orynda – Qazaqstan. So­dan keıingi oryndarǵa Ulybrı­tanıa, Irlandıa jáne Reseıdiń ulttyq quramalary jaıǵasty.