Qytaı aqpan aıynda ótetin qysqy Olımpıada oıyndaryna Avstralıa, Ulybrıtanıa jáne AQSH dıplomatıalyq boıkot jarıalaýy "qate áreket" bolǵanyn, sol úshin "qun tóleıtinin" málimdedi.

– Amerıka Qurama Shtattary, Ulybrıtanıa jáne Avstralıa Olımpıada platformasyn saıası aıla-sharǵy jasaý úshin paıdalandy. Olar qate áreketteriniń qunyn tóleýge májbúr bolady, – dedi Qytaı syrtqy ister mınıstrliginiń baspasóz hatshysy Van Venbın.

Qytaıdyń eskertýi  Beıjiń Olımpıadasyna boıkot jarıalaǵan batys elderiniń sany kóbeıip jatqan kezde jasaldy. 

Qazirge deıin AQSH, Avstralıa, Ulybrıtanıa jáne Kanada Beıjiń qysqy Olımpıada oıyndaryna óz mınıstrlerin jibermeıtinin málimdedi. 

AQSH prezıdenti Djo Baıden aldyńǵy aıda Qytaıda ótetin sport oıyndaryna boıkot jarıalaý jospary bar ekenin málimdegen. Keıinirek AQSH Beıjiń Olımıpıadasyna boıkot jarıalaǵan alǵashqy el atandy.

Vashıngtonnyń bul áreketinen kóp ótpeı Beıjiń AQSH-ty aıyptady.

Halyqaralyq uıymdar jáne kóptegen demokratıalyq elder Qytaıdy "Shyńjań avtonomıasynda turatyn uıǵyr, qazaq sıaqty musylman azshylyqtaryna genosıd jasady" dep aıyptaıdy.

Sonymen qatar, Beıjińniń Gonkongtaǵy saıası bostandyqtardy basyp-janshý áreketine qatysty da shıelenis kúsheıe tústi.