Búgin Astanada jalpyqalalyq senbilik ótedi. Sharaǵa 100 myńǵa jýyq adam, 450-den astam tehnıka jumyldyrylady, dep habarlaıdy elorda ákimdiginiń baspasóz qyzmeti. Bul týraly "Qamshy" portaly QazAqparatqa silteme jasaı otyryp habarlaıdy.
Ekologıalyq aılyq aıasynda Astanada qala aýmaǵyn sanıtarlyq tazartý, kósheler, trotýarlar men aýlaishilik aýmaqtar tazartylyp, aǵash otyrǵyzylady. Sonymen qatar, jańbyr sýy jelileri men aryq-naýa qubyrlary tazartylyp, saıabaqtar men gúlbaqtardaǵy jasyl kóshetterdi kútý boıynsha maýsymdyq agrotehnıkalyq jumystar júrgiziledi, zańsyz qoqys oryndary men lastanǵan ýchaskeler joıylady.
Aıta keteıik, senbilik kezinde astanalyqtar tal, úıeńki, qaraǵaı, shyrsha, shegirshin, terekterdiń 4 myńǵa jýyq kóshetin otyrǵyzady. Táýelsizdik dańǵylynan Q.Sátbaev (Mırzoıan) kóshesine deıin qalalyq ákimdik pen máslıhat ókilderi, Kásipkerler palatasynyń, QR İshki ister mınıstrligi, Áziret Sultan meshitiniń ókilderiniń qatysýymen 700-ge jýyq kóshet egiledi. Baıtursynov kóshesiniń boıyna Táýelsizdik dańǵylynan Sarykól kóshesine deıin 400-ge jýyq kóshet, Ońtústik-SHyǵys yqsham aýdanynda Talǵar, Taskesken jáne Sartaý kóshelerine 500 aǵash otyrǵyzylady. «Almaty» aýdanynda Táýelsizdik dańǵyly, Momyshuly dańǵyly, Qoshqarbaev kóshesi, Qaldaıaqov kóshesi, Baıtursynov kóshesi, Nájimedenov kóshesi, Baraev kóshesi, Kravsov kóshesi, 46-shy kóshe, Táshenov kóshesinde aǵashtar aǵartylady.
QR Parlamenti Májilisi men Senatynyń depýtattary, QR Prezıdenti Ákimshiliginiń ókilderi, QR Premer-Mınıstriniń keńsesiniń, QR Joǵarǵy sot ókilderiniń qatysýymen Orynbor kóshesinen Hýseın ben Talal kóshesi, № 31 kóshege deıin aǵash otyrǵyzylmaq. Bul jerde 1,5 myńǵa jýyq kóshet egiledi. Sondaı-aq «Araı» saıabaǵynda 80-ge jýyq aǵash otyrǵyzylady. Turan dańǵyly, Qonaev kóshesi, Qorǵaljyn tasjolynan Qabanbaı batyr dańǵyly, Beısekova kóshelerinde aǵashtar aǵartylady.
«Saryarqa» aýdanynda 1,1 myńǵa jýyq kóshet otyrǵyzylmaq. Bul jerde BAQ, qalalyq Ardagerler keńesiniń ókilderi jáne stýdentter qatysady. N. Tilendıev kóshesi, Babataıuly kóshesi, sondaı-aq Kóktal turǵyn alabynda kóshetter egiledi.
Eske sala keteıik, 2015 jylǵy 7 qyrkúıek pen 7 qazan aralyǵynda Astana qalasy aýmaǵyn sanıtarlyq tazartý, abattandyrý jáne kógaldandyrý boıynsha kúzgi ekologıalyq aılyq ótkiziledi.
