Semeılikter keler jyldyń mamyr aıyna deıin sapaly, arzan baǵadaǵy kókónispen tolyq qamtylady. Qazir qala irgesindegi «Prırechnoe» agrofırmasynda qyzý naýqan. Bul týraly "Qamshy" portaly QazAqparatqa silteme jasaı otyryp habarlaıdy.

Sharýashylyq barlyǵy 15 myń tonna ónim jınaýdy kózdep otyr. Onyń 3/1-i turaqtandyrý qoryna jiberiledi. Sý jańa nemistiń traktorlary ǵajap tehnıkalar. Jyldam qımyldaıdy, ónimdi ózi qazyp alyp, júk kólikterine uqypty tıep beredi. 

 20 jyldyq tájirıbesi bar mehanızator Dmıtrıı Bornnyń aıtýynsha, burynǵy traktorlarmen salystyrǵanda aıyrmashylyǵy jer men kókteı. Kabınasynda salqyndatqyshy bar. Qozǵalýy da óte yńǵaıly. Jumys ónimdiligi de artty. «Jumysyńdy yjdahatpen isteseń ǵana jemisin beredi. Bizdiń ujymda barlyǵy bir otbasynyń múshelerindeı bolyp ketken. Aýyzbirshilik myqty» - deıdi ol.

 «Prırechnoe» agrofırmasynyń negizi 1993 jyly qurylǵan. 1,5 myń gektar sýarmaly jeri bar. Bıyl 460 gektarǵa kartop, 44 gektarǵa pıaz, 45 gektarǵa sábiz, 30 gektarǵa oramjapyraq, 10 gektarǵa qyzylsha salynypty. Sharýashylyqta 200 aýyl turǵyny turaqty jumys isteıdi. Ónimderdi tókpeı-shashpaı jınap, qoımalarǵa toltyrý úshin maýsymdyq jumystarǵa qosymsha 100 aýyl turǵyny atsalysýda. Memleketten bólinetin sýbsıdıalar kólemi artyp keledi, jeńildetilgen baǵamen 600 tonna dızeldik otyn da berilipti. Endi sharýashylyq basshylary jas mamandarǵa jaǵdaı jasaýdy oılastyryp otyr. Bıyl agrofırma memlekettiń kómegimen jańadan sheteldik 5 traktor, 3 kombaın aldy, dep habarlaıdy 24.kz.