Búgin Qyzylordada Qala kúnin merekeleý «Shubat-qymyz» festıvalimen bastaldy. Ulttyq sýsyndy ulyqtaǵan sharaǵa qala men aýdandardyń barlyǵynan derlik sharýalar kelip qatysty. Bul týraly "Qamshy" portaly QazAqparatqy silteme jasaı otyryp habarlaıdy.
Festıválda aımaq basshysy Qyrymbek Kósherbaev qyzylordalyqtardy merekelerimen quttyqtady.
Búginde Syr óńirinde qymyz-shubatqa suranys artyp keledi. «Sondyqtan qymyzhana jelilerin keńeıtip, qymyz óndirý tehnologıasyn damytý kerek» - deıdi mamandar. Búginde jylqynyń súti - ultymyz úshin qarjy tabýdyń kózi ǵana emes, emdik qasıeti mol ónim sanalady. Iaǵnı, ulttyq brendke aınalyp otyr.
Festıválǵa 2 myń lıtr shubat, 1500 lıtr qymyz jáne sút ónimderinen jasalǵan qurt, irimshik ákelingen. Sondaı-aq, qazaqy naqyshta daıyndalǵan qolóner buıymdary da kórme tórinen oryn aldy. Aımaq basshysy kórmeni aralap shyǵyp, ulttyq sýsynnan dám tatty. Merekelik sharada qala jastary «Qara jorǵa» bıin bılese, ata-ájeler ulttyq dástúrlerdi kórsetti.
- Tórt túliktiń tóresi túıe men Qambar atanyń sýsyndary túrli dertke daýa ekendigin ata-babamyz áldeqashan dáleldegen. Sol sara joldy jalǵap, búgin qala kúni merekesin aqtan dám tatyp bastap otyrmyz. Mereıli mereke qutty bolsyn, - dedi oblys ákimi Q.Kósherbaev.
Festıvál ulttyq oıyndarmen jalǵasty. Balýandar beldesi, asyq atý, gir kóterý, qol kúreste myqtylar anyqtaldy.
Jalpy, qala kúni merekesi bıyl keń kólemde atalap ótiledi. Qaýyn-qarbyz, kondıterlik ónimder jáne balalar shyǵarmashylyǵy festıvali, jas aqyndar músháırasy, aýyl sharýashylyq jármeńkesi, sporttyq saıystar uıymdastyrylyp, áleýmettik nysandar paıdalanýǵa beriledi. Qala kúni estrada juldyzdarynyń qatysýymen ótetin gala-konsertpen qorytyndylanady.
