Sıngapýr qalasynda áleýetti sıngapýrlik ınvestorlarǵa Qazaqstan Respýblıkasynyń ınvestısıalyq múmkinshilikterin tanystyrý boıynsha roýd-shoý ótti. Bul týraly "Qamshy" portaly Qazaqparatqa silteme jasaı otyryp habarlaıdy.
İs-sharany Qazaqstan Respýblıkasynyń Sıngapýr Respýblıkasyndaǵy elshiligi jáne Singapore Business Federation qoldaýymen «KAZNEX INVEST»Eksport jáne ınvestısıalar jónindegi ulttyq agenttigi uıymdastyrdy.
QR SİM baspasóz qyzmetiniń habarlaýynsha, qazaqstandyq delegasıany QR Investısıalar jáne damý vıse-mınıstri Raqym Oshaqbaev basqaryp bardy. Delegasıa quramyna ulttyq kompanıalardyń ókilderi, birqatar oblystardyń ákimderi, «Qorǵas-SHyǵys qaqpasy» AEA jáne «Taraz hımıalyq parki» AEA-nyń, sondaı-aq jeke kompanıalardyń ókilderi kirdi. Sıngapýr tarapynan is-sharaǵa eldiń jetekshi kompanıalary men 100-den asa uıymdarynyń ókilderi qatysty.
Sıngapýrdaǵy QR ókili Erlan-Baýdarbek-Qojataev is-shara qatysýshylaryn Qazaqstandaǵy áleýmettik-ekonomıkalyq jaǵdaımen, onyń ishinde jańa «Nurly jol» ekonomıkalyq saıasatymen tanystyryp ótti. Ol Qazaqstan men Sıngapýr arasyndaǵy ekijaqty qarqyndy damyǵan qatynasty jáne 2015 jyldyń 16 shildesinen bastap Sıngapýrmen vızasyz rejimdi engizgenin tilge tıek etip, sıngapýrlyq ınvestorlardy ózara yntymaqtastyq qatynas ornatýǵa shaqyrdy.
Raqym Oshaqbaev sıngapýrlyq ınvestorlarǵa ınvestısıalyq artyqshylyqtardy jańǵyrtý jónindegi qabyldanyp jatqan sharalar men jańa ınvestısıalar paketi týraly aıtyp, Qazaqstannyń bıznes klımatyn tanystyrdy.
Áleýetti ınvestorlarǵa sondaı-aq roýd-shoý aıasynda Qazaqstannyń agroónerkásip, hımıa jáne munaı hımıasy salasyndaǵy, mashına jasaýdaǵy, medısınalyq jabdyqty óndirý, qurylys materıaldaryn óndirý, ınfraqurylym, kólik-logıstıkalyq salasyndaǵy ınvestısıalyq múmkinshilikterdi tanystyrdy.
Sondaı-aq QR Investısıalar jáne damý vıse-mınıstri Raqym Oshaqbaevpen Olam International Limited, Food Empire Holdings Limited, Changi Airports International Pte.Ltd., AMS Consultants, OOILAYLENG, Tommy Lim jáne basqa da iri sıngapýrlik kompanıalardyń ókilderimen kezdesýler uıymdastyryldy.
