Aqtóbe oblysynyń ákimi búgin qala ishindegi bazarlardy aralap, ondaǵy baǵa turaqtylyǵyn qarady. İri qara maldyń etin satýshylar qaǵazdyń bir jaǵyna 850 teńge, ekinshi jaǵyna 900-1100 teńge dep jazǵan. Kózboıaýshylyqty kórgen óńir basshysy baǵany úzdiksiz baqylaýdy.  Bul týraly "Qamshy" portaly  Bnews.kz-ke silteme jasaı otyryp habarlaıdy.

 Senbidegi jumys "Tabys" komýnaldyq bazarynan bastaldy. Munda ár aptanyń senbi kúni aýyl sharýashylyǵy jármeńkesi ótedi. Bul joly Qarǵaly, Yrǵyz, Temir aýdandary bazarǵa kókónis pen et jáne et ónimderin, sút jáne sút ónimderin, balyqty qoıdy. Qalalyq kásipkerlik bóliminiń basshysy Anar Darjanovanyń aıtýynsha, jármeńkedegi baǵa bazar qunynan 15-20 paıyzǵa arzan. Munda jergilikti sharýalardyń ónimderi men reseılik taýarlar satýǵa shyǵaryldy.

Bazar ishin aralaǵan óńir basshysy Berdibek Saparbaev aldymen et baǵasynyń turaqsyzdyǵyn synǵa aldy. Máselen, iri qara mal etiniń bir kelisi 850 teńge dep jazýly turǵanymen, ekinshi betindegi baǵa 900 teńge bolyp shyqty. "Bul durys emes. Baǵa ártúrli. Adamdardy, tutynýshylardy aldaýǵa bolmaıdy. Muny "Nur Otan" partıasynyń oblystyq fılıaly qatań baqylaýǵa alýy kerek. Eki túrli baǵa halyqty aldaý. Oǵan jol bermeımiz", - deıdi B.Saparbaev. Keıin bazar ishindegi jergilikti, otandyq ónimderdi qarap, statısıkalyq málimettermen bazar baǵasyn salystyrdy.

Oblys ákimi Berdibek Saparbaev "Tabys" bazarynyń sanıtarlyq normaǵa saı kelmeıtinin, et shabý bólmesindegi etterdiń jerde jatqanyn synǵa aldy. Bazar ákimshisi, "AzıaAgroHoldıng" JSHS-niń dırektory Saýranbek Rahıevke jaǵdaıdy retke keltirýdi tapsyrdy. "Satýshylar bazardaǵy oryn úshin ártúrli aqy tóleıdi. 17-25 myń teńge aralyǵynda bolǵanymen, naqty sharshy metrine qansha tóleıtinin bazar basshysy bilmeı otyr. Jumys durys júrgizilmeıdi", - deıdi óńir basshysy.

Tústen keıin Berdibek Saparbaev qalanyń eski bóliginde ornalasqan Ortalyq bazarǵa bardy. Mundaǵy kólik tyǵynyn kórgen óńir basshysy bazarǵa jaıaý barýdy jón kórdi. «Munda sanıtarlyq talap saqtalmaǵan. Tamaq pen kıim-keshek bir jerde satylady. Órt qaýipsizdigi de rettelmegen», - deıdi B.Saparbaev.

Munda da 130-150 teńge bolǵan sábiz baǵasy 100 teńge dep aýystyrylǵan. Al 1100 teńge bolǵan et baǵasy 850 teńge bolyp ózgertildi. Muny da oblys ákimi áshkerelep, satýshylarǵa eskertý jasady.

Aıta keteıik, "Tabys" komýnalyq bazarynda kartop 55, sábiz 75, qarbyz 25-30 teńgege satyldy. Al iri qara mal eti 850-1300 teńge aralyǵynda boldy.