Avstralıalyq ǵalymdar Qus joly galaktıkasynan buryn-sońdy baıqalǵan eshteńege uqsamaıtyn belgisiz nysandy tapqanyn jarıalady.

Alǵash ret stýdent ashqan nysan ár 18 mınýt saıyn joıqyn radıoenergıa bóletini baıqaldy. 

Zertteý toby kóbirek málimet jınaý úshin jumys istep jatqanyn aıtady.

Bul nysandy alǵash ret Kertın ýnıversıtetiniń qurmetti stýdenti Taıron O'Doertı Batys Avstralıada teleskop pen ózi ázirlegen jańa tehnıkany paıdalaný arqyly ashqan.

"Múldem kútpegen jaǵdaı boldy. Bul – astronomdar úshin tańǵalarlyq baıqaý, óıtkeni buǵan deıin ǵaryshta oǵan uqsaıtyn eshteńe belgili emes" deıdi Kertın ýnıversıtetindegi astrofızık doktor Natasha Herlı-Ýolker.

Zertteý toby jyldar boıy derekterdi zerttegennen keıin nysannyń Jerden 4000 jaryq jyly qashyqtyqta ornalasqanyn, onda keremet jaryq jáne óte kúshti magnıt órisi bar ekenin anyqtady.

Nysannyń ne úshin erekshe ekeni jumbaq kúıinde qalyp otyr.

Doktor Herlı-Ýolker "bul – sırek kezdesetin bir rettik oqıǵa" nemese adamzat "buryn-sońdy baıqamaǵan úlken jańa popýlásıa" bolýy yqtımal degen pikir aıtady. Ol taǵy jańa nysan qupıasynyń ashylýyna asyǵatynyn jetkizdi.