Búgin Parlament Májilisiniń jalpy otyrysynda palata depýtattary «Shanhaı yntymaqtastyq uıymyna múshe memleketterdiń úkimetteri arasyndaǵy halyqaralyq avtomobıl tasymaldary úshin qolaıly jaǵdaılar jasaý týraly kelisimdi ratıfıkasıalaý týraly» zań jobasyn maquldady. Atalǵan kelisim 2014 jyly Dýshanbe qalasynda jasalǵan. Bul týraly Qamshy portaly QazAqpartqa silteme jasaı otyryp habarlaıdy.

Tutastaı alǵanda, qujat SHYU memleketteri arasyndaǵy halyqaralyq avtomobıl tasymaldary úshin qolaıly jaǵdaı jasap, ony damytý úshin taraptardyń kúsh-jigerin úılestirýdi qarastyrady. Budan bólek, kelisim aıasynda halyqaralyq avtomobıl tasymaldaryna qatysty taraptardyń qujattamasyn, rásimderi men talaptaryn jeńildetý jáne úılestirý sharalary qamtylady.

«Qujatta Qazaqstan, Qytaı, Qyrǵyzstan, Reseı, Tájikstan jáne Ózbekstan arasynda ruqsat júıesi negizinde kelisilgen baǵyttar boıynsha júk tasymaldaý kózdelip otyr. Bul úshin kelisim aıasynda alty baǵyt aıqyndalǵan. Olardyń tórteýi Qazaqstan arqyly ótedi. Sonymen birge, ár baǵytty ashý merzimi bekitilgen ári olardyń merzimi 2020 jyldan keshiktirilmeıdi. Kelisim kúshine engennen keıin uıymǵa múshe memleketterdiń tasymaldaýshylary bekitilgen baǵyttar boıynsha tasymaldardy júzege asyrýǵa, sonyń ishinde Qytaıdyń shyǵys bóliginen Batys Eýropaǵa deıin júk tasýǵa múmkindik alady», - dedi zań jobasy boıynsha baıandaǵan QR Investısıalar jáne damý mınıstri Áset Isekeshev.

Onyń aıtýynsha, kelisim qabyldanǵan jaǵdaıda Qazaqstan arqyly avtomobıl kóligimen ótetin tranzıttik júkterdiń kólemi 2020 jyldan bastap, 73 mln tonnaǵa deıin artatyny kútiledi.