Áleýmettik járdemaqy alýshylardyń eńbek etýge degen yntasy qamtamasyz etilýi kerek. Búgin Parlament Májilisinde talqylanǵan «Qazaqstan Respýblıkasynyń keıbir zańnamalyq aktilerine halyqty áleýmettik qorǵaý máseleleri boıynsha ózgerister men tolyqtyrýlar engizý týraly» zań jobasy boıynsha túsinik bergen depýtat Gúlnár Seıitmaǵanbetova osylaı málim etti. Bul týraly Qamshy portaly Qazaqparatqa silteme jasaı otyryp habarlaıdy.

«Búgingi zań jobasy Elbasynyń tapsyrmasyna, sonyń ishinde bes ınstıtýsıonaldyq reforma aıasynda júktelgen tapsyrmany oryndaýǵa baǵyttalady. Bundaǵy basty másele - qazirgi kúni elimizdegi azamattar memleket tarapynan kóptegen járdemaqylardy, ataýly kómekterdi alyp keledi. Osynyń bárine azamattar kóptegen qujattar jınaıdy, sosyn ol qujattardyń árqaısysy ártúrli ataýmen atalady. Osynyń bárin biriktirip, járdemaqy alýshylardyń jumysy ońaılatylady. Ekinshiden, Elbasy aıtyp júrgen másele - járdemaqy alatyndardyń eńbek etýge degen yntasyn qamtamasyz etý», - deıdi depýtat. Onyń aıtýynsha, zań jobasynda qarastyrylǵanyndaı, endigi kúni ataýly áleýmettik kómek alatyn azamattar eger eńbekke qabiletti bolsa, onda olarmen áleýmettik kelisimsharty jasalady. Bul boıynsha atalǵan azamat jumyspen qamtylyp qana qoımaı, medısınalyq kómekter de qamtylady. Máselen, ondaı azamat nashaqor nemese ishkilikke salynǵan bolsa, onda tegin medısınalyq kómek retinde emdelýge múmkindik beriledi.  

«Eger eńbek etýge qabiletti azamat kelisimshart boıynsha memleket usynyp, oǵan taýyp bergen jumystan bas tartsa, onda onyń áleýmettik járdemaqysy toqtatylady. Tek balalaryna ǵana tólenedi», - dedi G. Seıitmaǵanbetova.

Depýtattyń sózine qaraǵanda, zań jobasynda áleýmettik kómekter alyp kele jatqan azamattarǵa qarjylyq jaǵynan memlekettik qoldaýdy qarastyra otyryp, eńbekke qabilettilerdiń yntasyn arttyrý ıdeologıasy kórinis tabady.