Memlekettiń qaramaǵyndaǵy kompanıalar elimizdegi jeke bıznestiń damýyna tolyqqandy múmkindik bermeıdi. Astanadaǵy kásipkerlikti damytý ortalyǵynyń dırektory Nurlan Qulbatyrov osylaı deıdi. Onyń aıtýynsha, mundaı kompanıalardy senimdi jeke ınvestorlardyń qolyna ótkizý kerek. Bul týraly Qamshy portaly Baq.kz –ke silteme jasaı otyryp habarlaıdy.

Aıta keteıik, qazirgi tańda elimizde jekeshelendirýdiń ekinshi tolqyny júrip jatqany belgili. Osy naýqan aıasynda respýblıka aýmaǵyndaǵy memlekettik nysandardyń birshamasy satylymǵa qoıyldy. Sarapshylardyń aıtýynsha, bul ádisten memleket esh utylmaıdy jáne halyq ta zıan kórmeıdi.

«Birinshiden, jekeshelendirýdiń ekinshi tolqynynda biz álemdegi eń úzdik tájirıbelerdi eskerdik. Atap aıtqanda, «Yellow Pages» dep atalatyn qaǵıdalardyń qoldanylýy. Ekinshiden, jekeshelendirý kezinde transporentti júıeni qalyptastyrý. Máselen, memlekettik múlik reestri janynan alań qurylady. Sonyń arqasynda, satyp alýshy men satýshy arasyndaǵy qarym-qatynasty tolyq qadaǵalaýǵa múmkindik týady», - dedi Nurlan Qulbatyrov.

Onyń aıtýynsha, jekeshelendirý úrdisterin iske qosý maqsatynda Úkimetpen kompanıalardy básekeles ortaǵa berý úshin kelesi tásilder usynylǵan:

1. Keıbir eń iri aktıvter tikeleı satý jolymen nemese IPO jáne SPO tetikteri arqyly qor naryǵyna shyǵarý jolymen strategıalyq ınvestorlarǵa, onyń ishinde 2018 jylǵy 1 qańtarǵa deıin «Astana» halyqaralyq qarjy ortalyǵynyń alańyna (AIFC) iske asyrylady;

2. Basqa kompanıalar aýksıonda nemese kompanıalarǵa jeke ınvestor qatysýy bar bolsa, tikeleı satý tásilderin paıdalaný arqyly satylady.

Aıta keteıik, aýksıonda satý kezinde saýda-sattyq sanyna shekteý qoıylady. Birinshi satylym aǵylshyn ádisi boıynsha baǵany kóterý arqyly júrgiziledi. Eger obekt qyzyǵýshylyq týdyrmasa, onda ekinshi jáne úshinshi saýda golandtyq tásilmen baǵany túsirý arqyly júrgiziletin bolady. Úsh ret saýda júrgizgennen keıin satyp alýshylar bolmaǵan jaǵdaıda, obekti taratylýǵa jatady.

3. Jalǵyz talap – básekelestik ortaǵa beriletin kompanıalardyń satylatyn aktıvteriniń qyzmet baǵytyn saqtaý bolyp tabylady.

4. Jaqsy aktıvterdiń satylyp, al az qyzyǵýshylyqty týdyratyndary memlekette qalý jaǵdaıyn boldyrmas úshin, bólshekteýsiz, qaıta qurylymdaýsyz nemese jeke bólikke bólýsiz obektilerdi satýdy qamtamassyz etý usynylady.

Aldynǵy jyldardaǵy jekeshelendirýdiń tájirıbesin eskere otyryp, Úkimet prosestiń barynsha aıqyndyǵyn jáne tıimdiligin qamtamasyz etýge nıettenedi.