Serik Qojanuly Qulmyrzaev - jaqynda BUU jáne IýNESKO janyndaǵy Adam quqyǵy halyqaralyq federasıasy men ǵylymı ınstıtýttary Eýropalyq qaýymdastyǵynyń jáne halyqaralyq attestasıalyq Keńesiniń halyqaralyq "Qanatty arystan" ordenimen marapattaldy. Bul týraly Qamshy portaly QazAqpartqa silteme jasaı otyryp habarlaıdy.
Sonymen qatar, gir tasyn kóterý sportynyń sheberi ataǵyna ıe boldy. Bul týraly Qarmaqshy aýdandyq ákimdiginiń baspasóz qyzmeti habarlady.
Eske sala ketsek, 2014 jyly tamyzdyń 13 men 16-sy kúnderi Belarýs memleketiniń Vıtebsk qalasynda gir tasyn kóterýden ekinshi Dúnıejúzilik Olımpıada, Belarýs memleketiniń táýelsizdik kúnine arnalǵan halyqaralyq týrnır jáne ardagerler arasynda gir kóterýden álem chempıonaty qatar ótken bolatyn. Dúbirli dodaǵa Qazaqstan atynan segiz sportshy qatysty. Solardyń biri- 63 jastaǵy ardager sportshy Qulmyrzaev Serik Qojanuly. Ol 16 kelilik gir tasyn 2 mınýtta julqa 78 ret, serpe 94 ret kóterdi. Sondaı-aq, 16 kelilik gir tasyn 3 mınýtta 75 ret julqa kóterip, ardager sportshy qarsylastaryn artta qaldyrdy. Osyndaı jetistiginiń arqasynda Qazaqstan atynan shyqqan sportshy toptyq normatıvtik jattyǵýlarda úzdik nátıje kórsetkeni úshin Gınnestiń rekordtar kitabynda tirkelgen kórsetkishti jańartty.
«310 spartandyqtar» jobasy boıynsha Gınness kitabyna ený úshin 400- deı sportshy jarty saǵat boıy gir jattyǵýlaryn jasaǵan. Osylaısha jappaı jattyǵý oryndaý barysynda qarmaqshylyq sportshynyń esimi Gınnestiń rekordtar kitabyna jazyldy. Jańa rekord jasaýǵa Qazaqstan, Reseı, Belarýs, Polsha, Germanıa, Latvıa jáne Lıtvanyń sportshylary úmitker boldy. Jalpy bul saıystarǵa 34 memleketten 400 ge jýyq sportshy qatysqan. Eń jasy- 4 jasar reseılik balǵyn bolsa, Latvıadan 90 jastaǵy qarıa óz ónerlerin ortaǵa saldy. Sportshylardyń barlyǵy derlik gir tasyn julqa jáne serpe kóterýden saıysty. Serik Qulmyrzaev 60-64 jas aralyǵyndaǵy ardagerler arasynda 90 kelige deıingi salmaqta baq synady. Memlekettik qyzmetshi 2014 jyly 8 tamyzda zeınetkerlikke shyqqan boıda jarysqa attanyp,oljaly oraldy. Bir qyzyǵy, sala ardageri sport zalda emes kókalda, tabıǵat aıasynda shynyǵady. Jas kezinen erkin kúres, sambo, dzúdomen aınalysqan Serik Qulmyrzaev sport sheberine kandıdat. Atasy sekildi sportpen shuǵyldanatyn nemereleri bar. Olar da respýblıkalyq, oblystyq jarystarda júldeli oryn alyp júr.
Aıta keteıik, 2013 jyly S.Qulmyrzaev tórt dúrkin Álem birinshiliginiń, Eýropa, Azıa, Eýrazıa, Belorýs jáne Reseı chempıonattarynyń, F.Ýshakov pen M.Lomonosov atyndaǵy halyqaralyq jarystardyń jeńimpazy atanyp 11 altyn medaldyń ıegeri boldy.
Pikir qaldyrý