"Aqparattyń qoljetimdiligi týraly" zań jobasyn ázirleýshiler kez kelgen jaǵdaıda da shekteýge jatpaıtyn aqparattyń tizimin jasady. Bul týraly búgin xalyqaralyq konferensıada QR Parlamenti májilisiniń depýtaty Máýlen Áshimbaev málim etti. Bul týraly Qamshy portaly Inform.kz-ke silteme jasaı otyryp habarlaıdy.

"Bizdiń qoldanystaǵy "Memlekettik qupıalar týraly" zańymyzda qupıalaýǵa jatpaıtyn aqparat tizimi bar. Biz bunymen toqtaǵan joqpyz. Biz qupıalaýǵa ǵana emes, shekteýge de jatpaıtyn aqparattardyń tizimin jasap shyqtyq. Biz bul tizimdi meılinshe keńeıtýge tyrystyq. Onda lańkestik aktileri týraly faktiler, órt qaýipsizdigi jaǵdaıy, sanıtarlyq, epıdemıologıalyq jáne radıasıalyq qaýipsizdik, azyq-túlik qaýipsizdigi, respýblıkalyq jáne jergilikti búdjettiń jumsalýy, jasaqtalýy týraly aqparattar jáne xalyqtan eshqashan jasyrylmaýy tıis málimetter engen", - dedi depýtat.

Onyń sózi boıynsha, zań jobasynda osy aqparattardyń kózderi bolyp tabylatyn sýbektiler de  kórsetilgen.

"Sizder bilesizder, ulttyq kompanıalar men 100 paıyz memleket menshigindegi kompanıalar bar. Soǵan baılanysty, zań ázirleýshiler ulttyq kompanıalar men kvazımemlekettik sektorlarǵa da qoǵam úshin aqparattyń qoljetimdiligin qamtamasyz etýleri mindetti dep kórsetip otyr", - dedi ol.

Aqparat ıelenýshilerdiń taǵy bir toby - búdjettik qarajatqa ıe bolǵan zańdyq tulǵalar.

"Olar memlekettik emes qurylymdar da bolýy yqtımal. Atap aıtqanda, búdjettik qarajat alǵan ÚEU, JSHS nemese AQ. Eger zańdy tulǵa memlekettik búdjetten kiris tapqan bolsa, búdjettik qarajatty jumsaý boıynsha aqparattardy usynýy tıis", - dep atap ótti M. Áshimbaev.  

Depýtattyń aıtýynsha, aqparatpen bólisýi tıis sýbektilerdiń qataryna monopolıalyq basymdyqqa ıe nemese tótenshe jaǵdaılar týraly, tabıǵı jáne texnogendik qaipsizdik aqparattaryna ıelik etetin zańdyq tulǵalar da kirgizilip otyr.