Keshe Karimmassimov.com saıtynda qańtar oqıǵasynan keıin qamalyp, búginde qylmystyq kodekstiń 5-baby boıynsha tergelip jatqan UQK-niń eks-tóraǵasy Kárim Másimovtiń densaýlyǵy nasharlaǵany týraly aqparat shyqty. Ol jerde "Másimov kóptegen sozylmaly syrqattarmen aýyrady, sonyń ishinde júregi nashar, dárigerler ony dereý qamaýdan bosatý kerektigin aıtyp otyr" delingen. Aqparat resmı bolmasa da biraz adam oǵan reaksıa tanytyp, Másimovtiń bosatylýyna qarsylyq bildirip úlgerdi.
Jýrnalıs Serikjan Máýlenbaı júrgizetin, resmı túrde BAQ dep tirkelgen "BESsımptomno" Telegram-kanaly qazaqstandyq jáne reseılik keı aqparat quraldary men Telegram-kanaldar Kárim Másimovti qoldaý boıynsha belsendi pıar-kompanıany bastaǵanyn jazady. Jelilik basylymnyń málimetinshe, Másimovti aqtap jazý úshin blogerlerge 200 eýro (shamamen 97 myń teńge) usynǵany týraly da aqparat bar. Telegram-kanal Jańa Qazaqstanda bári zań aldynda teń, Másimov aıyptalyp otyrǵan memlekettik tóńkeris jasaý áreketi týraly is barynsha ashyq bolatynyna, sot ádil sheshim shyǵaratynyna senim bildiredi.
Al qoǵam belsendisi Muhtar Taıjan qamaýda otyrǵandardyń ishinde aýyryp, hál ústinde jatqan kúdiktiler men sottalýshylar kóp ekenin tilge tıek etip, Másimovti bosatý týraly sóz qozǵaýdyń ózi artyq dep sanaıdy.
"Ol kánigi sportshy sıaqty edi ǵoı. Jelide túrli marafondarǵa qatysqanynan kóptegen sýret bar. Marafonshynyń júregi aýyrady degenmen kelisý qıyn. Ekinshiden, barlyq azamatqa, onyń ishinde sottalýshylarǵa birdeı kózqaras bolýy kerek. Eger Másimovti osyndaı dıagnozben bosatatyn bolsa, mundaı dıagnoz qoıylǵan barlyq sottalýshyny bosatsyn. Máselen, qazir qańtar oqıǵasy boıynsha sottalyp jatqandar kóp. Solardan júrektiń ıshemıalyq aýrýyna analız alyp kóreıik, dıagnoz rastalsa, bosataıyq. Biraq olaı bolmaıdy ǵoı. Arondy qandaı jaǵdaıda bosatqanyn bárimiz bilemiz. Sondyqtan Kárim Másimovty bosatý týraly sóz qozǵaýdyń ózi artyq. Onyń ústine ol otanǵa opasyzdyq jasady dep aıyptalyp otyr" deıdi qoǵam belsendisi.
♦ QK 336-baby 4-bóligi – "Para alý"
♦ QK 362-baby 4-bóligi 3-tarmaǵy – "Bılikti nemese laýazymdyq ókiletigin asyra paıdalaný"
♦ QK 175-baby 1-bóligi – "Memleketke opasyzdyq jasaý"
♦ QK 179-baby 3-bóligi – "Bılikti basyp alýdy nemese ustap turýdy nasıhattaý nemese oǵan jarıa túrde shaqyrý, sol sıaqty bılikti basyp alý nemese ustap turý ne Qazaqstan Respýblıkasynyń konstıtýsıalyq qurylysyn kúshtep ózgertý"
♦ QK 218-baby 3-bóligi 3-tarmaǵy – "Qylmystyq jolmen alynǵan aqshany jáne (nemese) ózge múlikti zańdastyrý (jylystatý)"
Pikir qaldyrý