Tesla kompanıasynyń bas atqarýshy dırektory, álemdegi eń baı adam Ilon Mask dúısenbide Twitter-di satyp alý týraly kelisimge qol qoıdy.
"Sóz bostandyǵy – jumys istep turǵan demokratıanyń negizi, al Twitter – adamzattyń bolashaǵy úshin mańyzdy máseleler talqylanatyn sıfrlyq alań" dedi Mask satyp alýdan keıingi málimdemesinde.
Mask Twitter-diń algorıtmderdi ashyq bolatynyn aıtty. Ol buǵan deıin adamdar ne kóretinin jáne Twitter-de mazmunnyń qanshalyqty keń taralatynyn anyqtaıtyn baǵdarlamalyq quraldy ashý kerektigin jetkizgen. Álemdegi eń dáýletti adamnyń pikirinshe, Twitter onyń menshigine ótken soń, spam-bottar joǵalady. Mask Twitter-degi bottardyń taralýymen, belgili bir taqyryptardaǵy tvıtterge jaýap berýge baǵdarlamalanǵan jalǵan akkaýnttarmen kúrespek.
"Eger bizdiń Twitter-degi usynysymyz sátti bolsa, biz spam-bottardy jeńemiz!" degen Mask ótken aptada Twitter-de barlyq "shynaıy adamdardyń túpnusqalyǵyn rastaýdy" qalaıtynyn aıtqan.
"Barlyq adamdardy aýtentıfıkasıalaý arqyly Twitter-di burynǵydan da jaqsartqym keledi" dedi ol.
Oǵan qosa, ol Twitter-diń tólem júıesi úshin krıptovalúta (Dogecoin) qoldanylýy múmkin ekenin aıtty.
Kompanıanyń dırektorlar keńesi Ilon Masktyń áleýmettik medıa alybyn jekemenshikke alý týraly 44 mıllıard dollarlyq usynysyn biraýyzdan qabyldaǵannan keıin Twitter aksıalary 5%-dan astam qymbattady.
Aq úı bul kelisim týraly pikir suraǵan saýalǵa túsinikteme berýden bas tartty, degenmen AQSH prezıdenti Djo Baıden áleýmettik medıa platformalarynyń kúshine kópten beri alańdaǵanyn jetkizdi.
"Bizdiń alańdaýshylyqtarymyz aıaq astynan bolǵan joq. "Platformalar qajet jaǵdaıda jaýapkershilikke tartylýy kerek. Prezıdent áleýmettik medıa platformalardyń, sonyń ishinde Twitter jáne basqalardyń jalǵan aqparat taratý kúshi týraly alańdaýshylyqtary týraly kópten beri aıtyp keledi" dedi dedi Aq úıdiń baspasóz hatshysy Djen Psakı.
Al respýblıkashyldardy, ásirese Trampty qoldaıtyn Fox News sıaqty basylymdar Ilon Masktyń satyp alýyn quptaıtyn jańalyqtar taratyp jatyr.
Pikir qaldyrý