Túrksib aýdany Baqytty Otbasy áleýmettik ortalyǵynda tirkelgen analarymyzdyń balalarynyń arasynda "Naýryz – kóktem meıramy" atty sýret baıqaýy ótti.

Naýryz merekesiniń ásemdiligin sýretteýge tyrysqan balalar ushqyr qıaldarynyń terendigin kórsetti. Ótkizilgen sharanyń maqsaty – balalardyń shyǵarmashylyq qabiletin shyńdap, óz belsendiligin kórsetýge múmkindik berý, sondaı-aq daryndy jastardy anyqtaý jáne kópshilikke shyǵarmashylyq sheberligin, qabiletin kórsetýge múmkindik jasaý boldy.

Sharaǵa jalpy sany 50 bala qatysty. Tóreshilerdiń sheshimimen úzdikteri anyqtalyp, madaqtama qaǵazdarymen jáne arnaıy syılyqtarmen marapattaldy.

Osy sharanyń ótkizýine septigin tıgizip, demeýshi retinde at salysqan Almaty qalasy Maslıhaty, "AMANAT" partıasynyń depýtaty, Shardınov Shýhrad Ahmetjanovıch myrzaǵa alǵysymyzdy bildiremiz.

Elimizdegi ár otbasynyń hal-ahýalyna úńilý, ómir súrý deńgeıin zertteý, áleýmettik jaǵdaıyn jaqsartý – ózekti máselelerdiń biri. Osy rette halyqtyń áleýmettik jaǵdaıyn kóterý Almaty qalasy Túrksib aýdany ákimidiginiń nazarynan tys qalǵan emes. Mundaı kezek kúttirmeıtin máselelerdi sheshý maqsatynda 2019 jylǵy tamyz aıynda Túrksib aýdany ákimdiginiń qoldaýymen Baqytty otbasy áleýmettik ortalyǵy ashylyp, óz jumysyn bastady.

Atalmysh áleýmettik ortalyq áleýmettik ál-aýqaty tómen otbasylarǵa, kópbalaly, jalǵyzbasty, múgedek bala asyrap otyrǵan otbasylarǵa zań, psıhologıalyq turǵydan kómek kórsetedi. Sonymen qatar, balala­ryn balabaqsha kezegine turǵyzý, turǵyn úı kezegine turǵyzý, egov portaly arqyly anyqtamalar alý, ataýly áleýmettik kómekke tirkeý, "Otbasy bank" qyzmetkerlerinen baspana alý týraly keńes alý júzege asyrylady.

Analardyń biliktiligin arttyrý maqsatynda, jumyspen qamtý negizinde Baqytty otbasy áleýmettik ortalyǵynda shashtaraz, bet árleý, kirpik ósirý, tyrnaq jasaý, kompúterlik biliktilik, smm marketıń, kıiz basý, balalarǵa jáne eresekterge arnalǵan massaj, aǵylshyn kýrstary tegin oqytylady. Óz kásibin ashyp bızneske bet burǵan analarǵa Bıznes bastaý boıynsha trenıń ótkizip, bıznes ıdeıasyn júzege asyrýǵa atsalysyp, kásibin qalaı júrgizý kerektigi týraly arnaıy mamandardan keńes alýlaryna jaǵdaı jasalǵan.

Almaty qalasy Túrksib aýdany Baqytty otbasy áleýmettik ortalyǵynyń basty maqsaty – muqtaj bolǵan kópbalaly jáne az qamtylǵan otbasylardyń ómir súrý deńgeıin kóterý jáne áleýmettik jaǵdaıyn jaqsartý.