"Ýtýlalymǵa jol joq" qozǵalysynyń belsendisi Nýraddın Sadyqov úkimet ýtılalym mólsherin 50 paıyzdan ary tómendetýge qulyqty emes dep, qoǵamdyq belsendiligin toqtatatynyn málim etti.
"Meniń sýbektıvti pikirlerim (árıne, qatelesken bolsam jaqsy bolar edi)
1. Úkimet sol ýtılalymǵa jasaǵan 50% jeńildikten ári qaraı túsirýge peıildi emes. Ony sońǵy kúnderi jasap jatyrǵan júristeri dáleldep otyr. 50%-dyq jeńildikke qatysty buıryq búgin-erteńderi kúshine enýi kerek.
2. Qazir qymbattaǵan kólik – odan ári qymbattamasa, arzandamaıdy. Sebebi, bizde avtoóndiris joq, sol sózdi syltaý etken alypsatarlyq bar. Al, ol – syrtqy valútaǵa táýeldi.
3. Álemde kólik defısıt, qymbat, bizde de sol sebep bolyp otyr degen dalbasa pikir. Iá, álemde pandemıa saldarynan týyndaǵan problema boldy. Qazir bul másele sheshilip, álem kólik defısıtinen birte-birte aıyǵyp keledi. Qoldan qymbattatyp otyrǵan – bizdikiler.
4. Eń basty suraqqa jaýap. Bul taqyrypty ózim úshin ýaqytsha jabamyn dep sheshtim. Sebebi, ashyq dıalogqa baryp, ýájdi pikirge qulaq asýǵa qulyqty bılikti kórip otyrǵan joqpyn. Olıgopolıa lobbısteri ǵana bar. Al, klavıatýra batyrlarynyń aıtaǵyna erip, jartasqa baryp, kúnde aıǵaı salýǵa nemese aıǵa jeke-dara shabýǵa rasyn aıtqanda, qulqym joq. Bul meniń sheshimim. Qurmetteısizder me, sóge jamandaısyzdar ma, óz erikterińiz. Osymen sóz támam" dep jazdy belsendi áleýmettik jelidegi paraqshasynda.
Qańtar oqıǵasynan keıin prezıdent Q.Toqaev el ishinde kópten sóz bolyp júrgen ýtılızasıalyq alym mólsherin tómendetý máselesin kóterip, úkimetke tıisti tapsyrma júktegen. Premer-mınıstriniń birinshi Roman Sklár ýtılalym kólemin 50 paıyzǵa deıin ǵana tómendetý múmkin ekenin málimdep, úkimet sheshimin jarıalaǵan. "Ýtılalymǵa jol joq" tobynyń belsendileri stavka mólsheri áli de joǵary ekenin, úkimet jekelegen toptyń múddesin qorǵaýmen aınalysyp otyrǵanyn, 50 paıyzǵa deıin tómendetý naryqta kólik qunynyń arzandaýyna áser etpeıtinin aıtady.
Pikir qaldyrý