Forbes Kazakhstan jýrnaly eldegi dáýletti adamdardyń dástúrli reıtıńin jarıalady. Reıtıńtiń aldyńǵy sapynda aıtyrlyqtaı ózgeris joq. Kóshti ádettegideı Vladımır Kım ($5 mlrd) bastap, Tımýr Qulybaev ($3,9 mlrd), Dınara Qulybaeva ($3,9 mlrd), Vácheslav Kım ($3,2 mlrd), Mıhaıl Lomtadze ($3 mlrd), Bolat Ótemuratovtarmen ($2,8 mlrd) jalǵasyp kete beredi.

Forbes tergelip jatqanyna baılanysty dúnıe-múlki buǵattalýy múmkin bolǵandyqtan tizimine Qaırat Satybaldy (2018 jylǵy reıtıńte №47) men Qaırat Boranbaevty (2021 jylǵy reıtıńte №14) qospaǵan. Al olardyń ornyn toltyrǵandar arasynda eks-prezıdent Nursultan Nazarbaevtyń jaqyndary bar.

Máselen, Darıǵa Nazarbaeva reıtıńke qaıta oralyp, 13 satyǵa jaıǵasqan. Onyń baılyǵy 584 mıllıon dollarǵa baǵalanǵan. Onyń túrli salada kásipteri kóp, ásirese medıakeńistikte birneshe iri jobalarǵa ıelik etedi. "Evropa plús Kazahstan", "Teleradıokompanıa Radıosıtı", "Nezavısımyı Televızıonnyı Kanal" (NTK telearnasy) sekildi kompanıalar tolyqtaı nemese jartylaı menshiginde. Budan bólek "DLS Group holdıńtik kompanıasy", "Regıon-Medıa", "A-Service Management" (elordadaǵy Dýman qonaq úıi) kompanıalarynyń keıbirine bútindeı, keıbirine jartylaı ıelik etedi.

Reıtıńke engen Nazarbaev áýletiniń kezekti ókili Bolat Nazarbaevtyń uly – Nurbol Nazarbaev. 38 jastaǵy kásipkerdiń baılyǵy 160 mıllıon dollarǵa teń. "Prime Capital Invest", "Korporasıa Úsh Qońyr Invest" kompanıalarynyń ıesi. "PLS ınvestısıonno-stroıtelnaıa kompanıa", "PLS-TM" kompanıalary negizgi aksıonerleriniń biri.

Budan bólek reıtıńke Darıǵa Nazarbaevanyń úlken uly Nurálı Álıev bıyl da engen. Ol 263 myń dollar baılyqpen tizimniń 26 satysynda tur.

Reıtıń basyndaǵy Tımýr Qulybaev Nursultan Nazarbaevtyń kúıeýbalasy, Dınara qyzy ekeni bárine belgili. Sondaı-aq joǵaryda aty atalǵan Vladımır Kım, Vácheslav Kım, Bolat Ótemuratov sekildi mıllıarderler N.Nazarbaevtyń jaqyn adamdary degen áńgime bar. Sondaı-aq el arasynda Nursultan Nazarbaevtyń ózi de eldegi eń baı adamdardyń biri ekeni týraly áńgime jeldeı esedi. Sońǵy ýaqytta Nursultan Nazarbaevtyń baılyǵy týraly túrli jýrnalısik zertteýler shyǵa bastady. Olarda NÁN tek ózi basqaratyn qorlar arqyly ǵana birneshe mıllıard dollarǵa ıelik etetini týraly aıtylady.