Shyǵys Qazaqstan oblysy Glýbokoe aýdanynda «Aıaýly jas kelin» IX dástúrli oblystyq baıqaýy ótti. Qatysýshylar qazaqtyń salt-dástúrlerin, ádet-ǵuryptaryn jáne taǵamdaryn bilýden saıysqa túsip, shyǵarmashylyq jáne zıatkerlik qabiletterin de kórsetti.

Qazaq halqynda «jaqsy qyz bolý - baqyt, jaqsy ul bolý - odan da úlken baqyt, al jaqsy kelin bolý - naǵyz baqyt» degen maqal bar. Búgin Glýbokoe mádenıet úıiniń aldy kishigirim aýylǵa aınalyp, ár kıiz úıdiń janynda shaı qaınatyp, qazanda jas kelinder baýyrsaq pisirip, jarystyń kórkin qyzdyrdy.

Oblystyq baıqaýǵa alǵashqy ret qatysyp otyrǵan Anjelıka qazaqtyń salt-dástúri, ádep-ǵurpy tańsyq emes ekenin jetkizdi. Ol eki jyl buryn qazaq otbsynyń kelini atanypty.

«Eki jyl buryn turmys qurdym. Basynda bári tańsyq boldy. Ýaqyt óte kele kóp dúnıeni úırendim. Qamyr ılep, nan jaıyp, baýyrsaq, shelpek pisirý men úshin úırenshikti. Aqıyq aqyn Muqaǵalı Maqataevtyń «Úsh baqytym» atty óleńin qazylar alqasy aldynda oqyp berdim. Búgin meniń qasymnan jan joldasym, 10 aılyq qyzym qoldap kelip otyr» deıdi Óskemen qalasynan kelgen qatysýshy Anjelıka Shabdanbekova.

Baıqaýǵa oblystyń ár aýdandarynan kelgen 16 kelin qatysty. Baıqaýdyń «Jas kelinniń bir kúni» atty alǵashqy bóliminde kelinder bir kúndik tynys-tirshiligin kórsetetin beıne rolık usyndy. Odan keıin «as adamnyń arqaýy» kezeńde ulttyq taǵamdardan as ázirlep, búginde umytylyp bara jatqan as túrlerin usynyp, daıyndalý joldaryn túsindirip ótti.

Intellektýaldyq saıysta qatysýshylar qazaq halqynyń salt-dástúri, ádet-ǵuryptary jaıly túrli taqyryptaǵy suraqtarǵa jaýap berip, al shyǵarmashylyq saıysta óz ónerlerin ortaǵa saldy. Biri án aıtty, biri bı bıledi, biri mánerlep óleń oqydy, taǵy biri pesadan úzindi kórsetti. Eń sońǵy «aq oramal» bóliminde ár ult ókiliniń qatysýshysy kelinniń basyna baılaıtyn oramaldyń shyǵý tarıhy, ereksheligi, oramaldyń taǵý mádenıeti jaıly jınalǵan kóremendermen ádil qazylar alqasyna egjeı-tekjeıli aıtyp berdi.

Osy oblystyq baıqaýǵa Úrjar aýdanynan kelgen qatysýshy Aıdana Tursynqojanova saıystyń tárbıelik máni zor ekenin, jas kelinderge bereri mol ekenin jetkizdi.

«Kelin atanyp, otbasy qurǵanyma 6 jyl boldy. Búginde úsh balam bar. Qazaq qyzy úshin úı sharýasy, baýyrsaq pisirip, qamyr ıleý, qonaq kútý tańsyq emes. Meni erte jastan bastap anam qolynan kelgenshe barlyǵyn úıretti. Keıin kelin atanǵanymnan keıin enem de bilmeginimdi tolyqtyrdy. Endi osy baıqaýǵa qatysqanym úshin olarǵa alǵys aıtyp, basqa jas kelinderge óz tájirıbemmen bólissem deıminBarlyq qatysýshylarǵa tabys, jeńis tileımin» dedi Aıdana Tursynqojanova.

Aımaqtaǵy qalalar men aýdandardan kelgen 16 qatysýshy «úzdik kelin» atalmynyna kimniń laıyq ekendigin barynsha pash etýge tyrysty.

Aıta keteıik burymdylar arasyndaǵy mundaı saıys óńirde birinshi ret ótkizilip turǵan joq. Bıyl dástúrli baıqaý Elimizdiń táýelsizdiginiń 30 jyldyǵyna arnalyp otyr. Saıystyń negizin qalaýshy Araılym Esimbekova hanym jyl saıyn qatysýshylarǵa qoıylatyn talaptar kúsheıtilip, jas kelinderdiń ózderin jaqsy qyrlarynan tanytyp keledi degen oı bildirdi.

«Búgin IX dástúrli ótip kele jatqan oblystyq «Aıaýly jas kelin» baıqaýy Glýbokoe aýdanynda óte joǵary deńgeıde ótýde. Óńirimizdiń ár jerinen kelgen 16 kelin baqtaryn synaýda. Osy jyly baıqaý erekshe ári qyzyqty ótýiniń bir sebebi SHQO-da ashylǵan Qazaqstandaǵy alǵashqy Dostyq úıiniń 30 jyldyǵyna oraı ár jyldary tek qazaq ultynyń qyzdary qatysyp kele jatqan baıqaýdyń aýqymy keńeıip, bas ult ókilderide qatysýǵa nıet bildirip, ózderińiz kórgendeı erekshe daıyndalyp kelgenderin pash etýde. Demek endi biz basqa etnostardyń salt-dástúrlerimen jáne erekshelikterimen tanysýǵa múmkindik aldyq. Bul shara otbasylyq qundylyqtardy dáriptep, qoǵamdaǵy analardyń mártebsiniń artýyna sep bolady dep oılaımyn» deıdi qazylar alqasynyń múshesi, «Aıaýly jas kelin» baıqaýynyń negizin qalaýshy Araılym Esimbekova hanym.

Osylaısha, qazaq kelininiń aqyly men parasaty synǵa túsken baıqaý da óz máresine jetti. Qazylar alqasy úshin «myńnan tulpar, júzden júırikterdi» anyqtaýdyń qıyn bolǵany ras.

Nátıjesinde «Aıaýly jas kelin» baıqaýynda úshinshi oryndy Óskemen qalasynan kelgen qatysýshy Anjelıka Shabdanbekova ıelense, ekinshi oryn Glýbokıı aýdanynan Ajar Tóleýqanova men Rıdderlik Ardaq Maltaevaǵa buıyrdy. Bas júlde Abaı aýdanynan kelgen Aıdana Baıtýsova jeńip aldy.

Baıqaýǵa qatysýshylardyń barlyǵy alǵys hattarmen, júldegerler baǵaly syılyqtarmen marapattaldy. Shyǵys Qazaqstanda bastalǵan "Aıaýly jas kelin" baıqaýy jaqyn arada respýblıkalyq deńgeıge shyǵarý josparlanýda.