Fransıalyq eureporter.co saıtynda "Fransıanyń bosqyndar jónindegi soty Muhtar Áblázovtyń isin qaraýǵa daıyndalýda" degen taqyryptaǵy aqparat jarıalandy.
"Áblázovtyń uzaqqa sozylǵan oqıǵasy Fransıanyń bosqyndar isi jónindegi ulttyq sotyna deıin jetti. Sot jaqyn arada olıgarhtyń bosqyn mártebesine qatysty sheshim shyǵarady", delingen aqparatta.
Al Paris Match basylymy bul sot sheshimi Qazaqstan men Fransıa arasyndaǵy qarym-qatynasqa áser etetinin jazǵan.
"Fransıa aldaǵy ýaqytta Áblázovqa qoldaý kórsetip, saıası baspanasynan aıyrmaıtyn bolsa, Qazaqstanmen qarym-qatynasy nasharlaıdy. Sebebi Qazaqstan men Fransıa arasynda qorǵanys jáne ýran óndirisi salalarynda iri kelisimsharttar bar", dep jazady Paris Match.
Basylymnyń deregine súıensek, Muhtar Áblázovqa qatysty másele 2009 jyly Qazaqstan prokýratýrasy Áblázov jalǵan nesıeler jáne kóptegen front kompanıalar arqyly BTA Bankinen 7,5 mıllıard dollardy jylystatqan degen málimdemesinen keıin bastalǵan.
Áblázovtyń ekstradısıasyn Qazaqstannan bólek Reseı men Ýkraına da surap otyr. Eki el de eks-bankırdi iri kólemde alaıaqtyq jasady dep aıyptaǵan. Qazaqstan men Ulybrıtanıada olıgarh ómirboıyna bas bostandyǵynan aıyrý jazasyna kesilgen.
Áblázovtyń ózi Qazaqstan sotynyń sheshimin saıası astary bar dep sanaıdy.
Pikir qaldyrý