Qańtar oqıǵasyna bir jyl tolǵanda májiliste oqıǵany tergeý barysy týraly qoǵamdyq tyńdaý ótti.

Bas prokýratýra "Qańtardaǵy" búlikke memlekettik tóńkeris jasaýǵa oqtalý áreketi degen baǵa berip, daıyndyq 2021 jyl boıy júrgenin jetkizdi. Berik Asylov tóńkeris jasamaq bolǵandar qatarynda uıymdasqan qylmystyq top músheleri, dinı ekstremıster, buryn sottalǵan azamattar, Qazaqstanda ekstremıstik dep tanylǵan, Eýroparlament beıbit saıası uıym dep tanıtyn "Qazaqstannyń demokratıalyq tańdaýy" qozǵalysynyń jaqtastary bolǵanyn aıtty.

Bas prokýror Berik Asylov depýtat Saýytbek Ábdirahmanovtyń "tóńkeriske oqtalý áreketiniń uıymdastyrýshysy kim?" degen suraqqa "memlekettik tóńkeris jasaýǵa oqtaldy", "otanǵa opasyzdyq jasady" degen kúdikpen  UQK eks-tóraǵasy Kárim Másimov pen onyń orynbasarlary ustaldy" dep jaýap berdi.

Budan bólek Berik Asylov "Dıkıı Arman" laqap atymen belgili qylmys áleminiń avtorıteti Arman Jumageldıevke UQK qyzmetkeri kómekteskenin, Nurpeıisov, Tileýjanova atty dinı ekstremıster Almaty áýejaıyn basyp alǵanyn habarlady.

Sondaı-aq jappaı tártipsizdik uıymdastyrdy degen kúdikpen 18 adam ustalǵanyn, olardyń 13-iniń isi sotta ekenin jetkizdi.

Qaza tapqandar týraly sóz qozǵalǵanda negizinen polısıa men ulttyq ulan qyzmetkerleri týraly aıtyldy.