Qytaı araǵa 3 jyl salyp sheteldikter úshin shekarasyn qaıta ashty dep habarlady BBC. Qytaıǵa kelýshiler endi karantınge jatqyzylmaıdy, tek 48 saǵat buryn ótken PTR testtiń nátıjesin kórsetse jetkilikti. 

Sondaı-aq jeksenbi kúni Qytaı bıligi sheteldikter úshin arnaıy vıza berip, elde birneshe ýaqytqa qalýǵa múmkindik berdi. Al jergilikti turǵyndarǵa qaıtadan tólqujat alýǵa ruqsat etti. 

Budan bólek, Qytaı men Gonkong arasyndaǵy teńiz jáne qurlyq tasymaly qaıta jandandy. Degenmen, saıahatshylar saparǵa shyqpas buryn PTR test tapsyrýy kerek. 

Qytaı 2020 jyldyń naýryz aıynyn beri  "nóldik kovıd" saıasaty aıasynda shekarany jaýyp tastaǵan. Qarasha aıynyń aıaǵyndaǵy jappaı narazylyqtardan keıin Beıjiń óziniń  karantınge baılanysty keıbir shekteýlerin jeńildetti. Alaıda "nóldik kovıd" saıasatynan resmı túrde bas tartpady. 

Qatań shekteýlerdi alyp tastaǵannan keıin 3 jyl boıy oqshaýlanǵan halyqta ujymdyq ımýnıtet qalyptaspaı, vırýs juqtyrǵandar sany arta tústi. Sońǵy kezderi eldegi aýrýhanalar men krematorıılerde kezek kóp ekeni týraly aqparat tarady. Al Qytaı bıligi koronavırýstan qaza tapqandardyń statısıkasyn jarıalamaıtyn bolǵan. Qytaımen kórshi elder shekara ashylysymen epıdemıanyń jańa tolqyny bastala ma dep qaýiptenedi.