BUU-nyń arnaıy ýákili Lıvıadaǵy kúresýshi eki jaq ulttyq birlik úkimetin qurý jóninde kelissózder júrgizgeni týraly málimdedi. Bul jaıynda «Qamshy» portaly bbc.com-ǵa silteme bere otyryp habarlaıdy. Bernardıno Leon bul kelisimniń Sqırat qalasyndaǵy baspasóz konferensıasy barysynda jasalǵany týraly aıtty.
Bul sheshimge kelmes buryn daýlasýshy eki jaq birneshe aı boıynda kelissózder júrgizgen bolatyn. Búginde Lıvıadaǵy bılikke eki úkimet talasýda: biri ıslamısterdiń qoldaýymen júrgizilip otyrǵan Trıpolıdaǵy úkimet, endi biri halyqaralyq uıymnyń qoldaýymen júrgizilip otyrǵan Tobrýktaǵy úkimet.
Marokkodaǵy baspasóz konferensıasynda Bernardıno Leon premer-mınıstr ornyna Faıez Sarradjdyń kandıdatýrasy usynylǵany jóninde aıtqan bolatyn. Sonymen qatar, vıse-premerlerdiń ornyna keletin azamattardyń attary belgili ekeni jarıa etildi.
«Memlekettiń 150 ókilimen bir jyl boıy jalǵasqan kelissózderden keıin, aqyry ulttyq birlik úkimetin qurýdy usyna alatyn sát týdy», - dep bólisti Leon myrza.
