Búgingi kúnniń basty jańalyǵy. Arnaıy shaqyrtýdan keıin elimizge Ýkraına prezıdenti Petr Poroshenko kelgen bolatyn. Qazirgi tańda «tanymaldylyǵy» artyp júrgen Poroshenka myrzany aldymen el premeri Kárim Másimov kútip alǵan-dy. Al, búgin Aqodada eki eldiń prezıdenti resmı túrde kezdesti.
Resmı kezdesýdiń kókesin kórsetti bul bas qosý. Ádettegideı kezdesý barysynda memleket basshylary qol alysty. Prezıdent rezıdensıasynda dástúr boıynsha qurmetti kúzet sapqa turdy. Memlekettik kúzet qyzmetiniń prezıdenttik orkestri basshylardy mýzykamen qarsy aldy. Orkestrdiń oryndaýynda eki eldiń ánurandary alma-kezek shyrqaldy.
Artynsha bekitilgen zańdylyq pen reglament boıynsha eki eldiń basshylary ózara qatynas haqynda birshama máselelerdi talqylady.
Qos prezıdentke resmı kezdesýge bekitilgen reglament jetispedi. Arqany keńge salǵan jemisti dıalog bekitilgen reglamentten eki ese kóp ýaqytty aldy. Petr Poroshenko myrza jary Marınamen birge Nazarbaevpen estelik sýretke de tústi.
Osynyń barlyǵyn saraptaı kele ekeý-ara áńgimeniń kelisti ári jemisti bolǵanyn paıymdaýǵa bolady.
Aldymen Poroshenko myrza Nursultan Ábishulyna arnaıy shaqyrtýy úshin alǵys jarıalady. Sonymen qatar, ol áńgime barysynda Elbasyn Qazaq handyǵynyń 550 jyldyq mereıtoıymen quttyqtady.
Aıta ketýimiz kerek, bul Poroshenkonyń Ýkraına prezıdenti postyna otyrǵannan beri Qazaqstanǵa jasaǵan alǵashqy resmı sapary.
Kezdesý barysynda Nursultan Ábishuly Kıevke jasaǵan óziniń alǵashqy saparyn eske ala otyryp: «Kıevke jasaǵan saparym esimde. Ol jaqta ár ýaqytta da qonaqjaılylyqty sezinemin. Sondyqtan da bizder Petr Alekseevıchpen jeke kezdesýimiz barysynda saıası jáne ekonomıkalyq yntymaqtastyǵymyzdyń barlyq máselelerin talqyladyq. Kóptegen máselelerde bizder ózara túsinistikke keldik»,- dep jetkizdi.
Bul kezdesýdiń de bergen jemisi az emes. Kezdesýde eki prezıdent Qazaqstan men Ýkraına arasyndaǵy saýda-ekonomıkalyq, otyn-energetıkalyq, agroónerkásip, kólik, ónerkásip pen ǵarysh salalaryndaǵy ekijaqty qarym-qatynastar jaıyn talqylady.
Sonymen qatar, Elbasy Poroshenko myrzanyń Mınsk kelisimin oryndaý barysyndaǵy eńbekterine rızashylyǵyn bildirdi.
Atalǵan kezdesý ýrkaındyq BAQ ókilderi tarapynan da talan-taraj talqyǵa túsip jatyr. Olar Qazaqstannyń DSU múshesi bolý eki el arasyndaǵy saýda qatynasyn odan ármen damytýǵa mol úles qosady dep senýde.
Aıan MEIRASH
