Bas prokýrordyń orynbasary Áset Shyndalıev Nazarbaevtyń nemere inisi Samat Ábishtiń eshqaıda ketpeý týraly qolhatpen júrgenin aıtty. Tergeýshiler álginiń eshqaıda qashyp ketpeıtinine senimdi kórinedi.

«Tergeý organdary óz tergeý jumystaryna súıenedi. Olar onyń eshqaıda qashpaıtynyna senimdi bolsa kerek. Jáne ol qylmystyq qýdalaý organdary aldyndaǵy zań boıynsha ózine júktelgen mindetteriniń eshqaısysyn buzbaǵan bolýy múmkin, Sondyqtan oǵan basqa bultartpaý sharasyn qoldaný týraly másele týyndamaǵan», – dedi ol.

Onyń aıtýynsha, tergeý amaldary júrip jatyr, basqa tergeý derekteri jarıalanbaıdy.

«Samat Ábishke qatysty is tergeý barysynda, tergeý júrip jatyr. Qylmystyq-prosesýaldyq Kodeks talabyna saı, tergeý derekteri derekteri jarıalanbaıdy. Ótkende Bas prokýratýra málimet berdi. Samat Ábish elde júr. Tergeý amaldary júrip jatyr. Oǵan qatysty «Qańtar oqıǵasy» kezinde laýazymdy ókilettiligin asyra paıdalandy degen kúdikpen is qozǵaldy», – dedi Shyndalıev Májilis kýlýarynda.

Qylmystyq iske Ábishtiń ne qatysy bar ekeni belgisiz, dep atap ótedi kursiv.media basylymy. Ázirge bul qylmystyq is boıynsha Samat Ábishtiń zańdy mártebesi týraly da naqty málimet joq.

19 qyrkúıekte Bas prokýratýra Ulttyq qaýipsizdik komıteti tóraǵasynyń burynǵy birinshi orynbasary Samat Ábishke qatysty qańtar oqıǵasy kezinde laýazymdy ókilettigin asyra paıdalandy degen kúdikpen tergeý bastap edi. 

Bas prokýratýra "Konstıtýsıaǵa saı, zań men sot aldynda barlyq azamattar teń" ekenin aıtyp qutylǵan.