Meksıkada Facebook áleýmettik jelisi arqyly kisi óltirýge jaldanǵan 14 jastaǵy jetkinshek qamaýǵa alyndy. Bul týraly «Qamshy» portaly bbc.com-ǵa silteme jasaı otyryp habarlaıdy. Tómengi Kalıfornıa shtatyndaǵy prokýratýra ókiliniń málimdeýinshe, jetkinshek polısıa qyzmetkerlerine Tıhýana qalasyndaǵy bir adamdy 31 myń pesoǵa (1,9 myń dollar) óltirgeni týraly moıyndaǵan eken.

Belgilengen ýaqytta jas jigit esirtki satatyn qala aýdandarynyń birine taksımen jetip, ol jerden qajetti qarý-jaraqqa ıe bolyp, óltiretin adamy týraly aqparat alǵan.

Óz mindetin oryndaǵan jetkinshek, polısıa qyzmetkerlerimen tutqyndalǵan soń, bolǵan jaıtty boıamasyz baıandap bergen.

Tıhýana qalasynyń polısıa basshysy Alehandro Lares Meksıkadaǵy qylmystyq toptardyń kisi óltirýge jas jetkinshekterdi bulaı jumyldyrýy alǵash ret oryn alyp jatqan jaıt emes ekendigin aıtyp ótti. Buǵan sebep, kámelettik jasqa tolmaǵan balalardyń qamaýǵa alyný merzimi eresekterge qaraǵanda áldeqaıda az bolatyndyqtan eken.

Máselen, 2010 jyldyń jeltoqsanynda Meksıkada «El Ponchıs» degen laqap atqa ıe 14 jastaǵy jetkinshek tórt kisi ólimine kináli ekenin moıyndaǵan bolatyn.